Lungdamna Laisiangtho Luke 1:26-38 sungsimna (Dec.24 ,2023)

Catholic Nisim Lungdamna Laisiangtho; Luke 1:26-38  ************* 26. Galilee gama khuapi khat ahi Nazareth(e) khua ah, 27. David’ innkuan panin Joseph min nei pasal khat tawh kiteeng dinga zuthawl kipiasa nungak khat’ kiangah Pasian in vantung mi Gabriel a sawl hi. Tua nungak’ min in Maria(f) ahi hi.

28. Tua ciangin vantung mi ama kiangah pai a, “Ave Maria aw, hehpihna tawh na kidim hi. Topa in nang tawh omkhawm a, numei khempeuh lakah thupha a ngah nu na hi hi,” a ci hi.

29. Ahi zongin vantung mi’ thugente’ hangin Maria a lungmang mahmah a, hih hopihna in bang a cihnopna hiam cih a ngaihsun hi.

30. Vantung mi in ama kiangah, “Maria aw, lau kei in, bang hang hiam cih leh nangmah in Pasian’ maipha na ngah zo hi.

31. Tu-in, nau na paai dinga tapa khat na nei ding hi; tua tapa’ min Jesu na phuak ding hi.

32. Amah mi lian hi dinga, Sang Penpa’ Tapa kici ding hi. Topa Pasian in a pu a pa David’ tokhom amah a pia ding hi. 33. Amah in Jacob’ innkuan uk tawntung dinga, ama kumpi gam bei ngei lo ding hi,” a ci hi.

34. Maria in vantung mi’ kiangah, “Keimah in nungak ka hi hi, hih thu koici pian theih ding ahi hiam?” a ci hi.

35. Vantung mi in ama kiangah, “Kha Siangtho in nangma tungah hong tung dinga, Sang Penpa’ vangliatna in nang hong tuam ding hi. Tua ahih manin na sung pana hong suak ding naungek pen siangtho dinga, Pasian’ Tapa kici ding hi.

36. Tua ciangin tu-in na tanaupihnu Elizabeth in a teek khit nung nangawnin tapa khat a paai khin hi. Amah tasel hi, kici napi-in a gaii zawh kha guk pha ta hi.

37. Bang hang hiam cih leh, Pasian’ aadingin ahi thei lo bangmah om lo hi,” ci-in a dawng hi.

38. Tua ciangin Maria in, “Keimah in Topa’ silanu ka hi hi, na gen bangin kei’ tungah hong piang ta hen,” a ci hi. Tua khit ciangin ama kiang panin vantung mi a paikhia hi.

Hih in Topa' Lungdamna Laisiangtho ahi hi.