Lungdamna Laisiangtho John 5:31-47 sungsimna (March 14,2024) Thursday

Catholic Nisim Lungdamna Laisiangtho John 5:31-47----------------31. Keimah in keima aading teci ka pan’ leh, ka teci panna thu man lo hi. 32. Kei aading teci a pang ding midang khat a om hi. Kei aadinga ama teci panna a manna thu ka thei hi.

33. Note in John’ kiangah kamtaite sawlin na kansak zo uh hi. Amah in thuman thutak teci a pang zo hi.

34. Ka teci panna in mihingte’ kiang pan hi lo hi. Ahi zongin note in hotkhiatna na ngahna dingun hih thu teng ka gen hi.

35. Amah in a taang meivak hi a, note in ama khuavakna ah tawlkhat sung bek nopsak ding na ut uh hi.

36. Ahi zongin keima teci panna in John’ teci panna sangin a lianzaw hi. Pa in zawh khit dinga hong piak ka nasepte ka sem a, Pa in kei hong sawlna thu hih nasepte in kei’ aadingin teci hong pang uh hi.

37. Kei hong sawl ahi Pa in zong kei’ aading teci a pang hi. Note in ama aw na za ngei kei uh hi. Ama meel zong na mu ngei kei uh hi.

38. Ama thu zong note’ sungah teeng lo hi. Bang hang hiam cih leh, note in ama hong sawl’ pa na um kei uh hi.

39. “Lai Siangtho hangin nuntak tawntungna ka ngah ding uh hi, ci-in note in na up manun limtakin na sin uh hi. Tua Lai Siangtho nangawn in keima aading teci a pang hi.

40. Ahi zongin note in nuntakna na ngahna dingun ka kiangah nong pai nuam kei uh hi.

41. Keimah in mite’ hong pahtawina ka sang kei hi.

42. Ahi zongin note in Pasian it-a zahtakna lungsim na neih loh uh ka thei hi.

43. Ka Pa’ minin kong pai a, note in nong sang kei uh hi. Ahi zongin midang khatpeuh ama minin hong pai leh, tua mi na sang ding uh hi.

44. Note in mihingte khat le khat kiphatin na kipahtawina uh sang napi-in, Pasian bek in hong piak theih minthanna na deih kei uh leh note in bangci bangin um thei ding na hi uh hiam?

45. Keimah in Pa’ mai-ah note hong mawhsak dingin hong ngaihsun kei un. Note in lamenin na muan uh Moses in note hong mawhsak ding hi.

46. Note in Moses na up taktak uh leh, kei zong nong up ding uh ahi hi. Bang hang hiam cih leh, amah in keima thu a gelh khin zo hi.

47. Ahi zongin ama gelhsate na up kei uh leh, keima thugen bangci up theih ding na hi uh hiam?” a ci hi.

+Hih in Topa' Lungdamna Laisiangtho ahi hi.

- Christu Topa aw na tungah phatna om ta hen.

Add new comment

5 + 3 =