Lungdamna Laisiangtho John 1:6-8,19-28 sungsimna (Dec.17,2023)

Lungdamna Laisiangtho John 1:6-8,19-28 sungsimna Dec.17,2023( Sunday ) *************** John 1:6-8,19-28 6. Pasian in mi khat hong sawl a, ama min John ahi hi. 7. Mi khempeuh in ama hangin thu a up theihna dingin khuavak thu teci a pang dinga hong pai ahi hi.

8. Amah khuavak hilo a, khuavak thu teci a pang ding bekin hong pai ahi hi.

19. Jerusalem khuapi a om Judah mite in John kiangah, “Nang kua na hi hiam?” ci-in a dong dingin siampite le Levi mite ama kiangah a sawl uh ciangin, ama teci panna hih ahi hi.

20. John in ki-im loin teltakin kipulaak a, “Keimah in Christu ka hi kei hi,” ci-in a gen hi.

21. Amaute in zong, “Tua ahih leh, nang kua na hi hiam? Elijah na hi hiam?” ci-in a dong uh hi. Amah in, “Ka hi kei hi,” a ci hi. “Kamsangpa na hi hiam?” a cih uh ciangin, “Ka hi kei hi,” ci-in a dawng hi.

22. Tua ciangin amaute in, “Nang kua na hi hiam? Ko hong sawlte’ kiangah ka genkik theihna dingun nangmah mah bang kici na hi hiam?” ci-in a dong uh hi.

23. John in, “Kamsangpa Isaiah in a gen bangin, ‘Topa’ paina ding lampi na tangsak un,’ ci-a gamlaka a kikopa’ aw ka hi hi,” a ci hi.

24. Tua banga a dong dingin a kisawl mite’ lakah Pharisee-te zong a kihel uh hi.

25. Amaute in, “Christu lah hilo, Elijah lah hilo, Kamsangpa lah hilo na hih leh, bang hangin hong tuisawp na hi hiam?” ci-in a dong uh hi.

26. John in amaute’ kiangah, “Keimah in tui tawh kong tuisawp hi. Ahi zongin note’ lakah na theih loh uh mi khat a om hi.

27. Amah ka nunga hong pai ahih hangin ama khedap khau a sutsak ding nangawnin ka kilawm kei hi,” ci-in a dawng hi.

28. Hih thute khempeuh John in a tuisawpna mun Jordan gun galkhat a om Bethany khua-a thupiang ahi hi.

Hih in Topa' Lungdamna Laisiangtho ahi hi.