Lungdamna Laisiangtho John 12:20-33 sungsimna (March 17,2024) Sunday

Catholic Nisim Lungdamna Laisiangtho John 12:20-33------------------20. Tu-in Pawi sunga Pasian bia dinga hong pai mite’ lakah Greek mite pawlkhat a om uh hi. 21. Tua mite Galilee gam Bethsaida khua mi Philip kiangah va pai uh a, ama kiangah, “Sia aw, Jesu ka mu nuam uh hi,” ci-in a gen uh hi.

22. Philip pai-a Andrew’ kiangah a gen hi. Tua ciangin Andrew zong Philip tawh pai-in Jesu’ kiangah tua thu a gen hi.

23. Jesu in amaute’ kiangah, “Mihing’ Tapa a min a kithansak ding hun hong tungta hi.

24. Ken a man takpi kong genin ah, mangbuh hum tang khat leilak ah kia-a a sih phot kei leh, khat bek mahin om niloh ding hi. Ahi zongin a sih leh, tampi a gah thei ding hi.

25. Ama nuntakna a it mi in nuntakna a taan ding hi. Hih leitung ah a nuntakna a mudah mi in nuntak tawntungna dingin tua a nuntakna a kemcing ding hi.

26. Keima na a sem peuhmah in ka nung hong zuih kul a, keima na a sem peuhmah keima omna munah hong om ding hi. Keima na a sem mi peuhmah Pa in a pahtawi ding hi.

27. “Tu-in lungmangin ka om hi, bang ka ci gen ding hiam! ‘Pa aw, hih hun panin hong hon in,’ ka ci ding hiam? Ka ci kei ding hi, hilo hi, hih thu hangin hih hunah a hong tung ka hi hi.

28. Pa aw, na min thangsak in,” a ci hi. Tua khit ciangin vantung pan aw khat ging a, “Ka thangsak zo a, khatvei ka thangsak lai ding hi,” a ci hi.

29. A nai-a ding mihonpite in hih thu a zak uh ciangin, “Van ging hi,” a ci uh hi. Pawlkhat in ahih leh, “Vantung mi khat in amah hopih hi,” a ci uh hi.

30. Jesu in, “Hih aw in kei’ aading hilo hi, note’ aading ahi hi.

31. Tu-in hih leitung in thukhenna a thuak ta ding ahi hi. Hih leitung ukpa tu mahmahin a kihawlkhia ding hi ta hi.

32. Leitung pan kei hong kikhai ciangin mi khempeuh keima lamah ka huai ding hi,” a ci hi.

33. Tua bang a gen ciangin ama sihna ding zia a gengen ahi hi.

+Hih in Topa' Lungdamna Laisiangtho ahi hi.

- Christu Topa aw na tungah phatna om ta hen.