Lungdamna Laisiangtho John 11:45-56 sungsimna (March 23,2024) Saturday

Catholic Nisim Lungdamna Laisiangtho John 11:45-56 --------------- 45. Tua ahih manin Mary’ kianga a hawh Jew mi tampite in Jesu’ bawl na lamdang a muh uh ciangin amah a um uh hi.

46. Ahi zongin pawlkhatte Pharisee-te’ kiangah pai uh a, Jesu’ bawlsa thu khempeuh a zasak uh hi.

47. Tua ahih manin siampi makaite le Pharisee-te in upa vaihawmte thu kikupna a neihpih uh hi. Amaute in, “Eite in bangci hih ding ihi hiam? Bang hang hiam cih leh, hih mipa in na lamdang tampi a bawl hi.

48. Eite in amah hi bangin om omsak le hang, mi khempeuh in amah um ding uh a, tua ciangin Rome mite hong kuanin, i mun siangtho le i minam bup hong susiamang ding uh hi,” a ci uh hi.

49. Ahi zongin amaute’ lakah khat ahi, tua kum siampi lian a sem Caiaphas in amaute’ kiangah, “Note in bangmah na thei kei uh hi.

50. Minam khat a buppi-a a manthan lohna dingin mipite’ tangin mi khat’ sihna in note’ aadingin a hoihzawkna note in na thei kei uh hi,” a ci hi.

51. Tua bang a cihna in ama utthu a gen hilo a, ahi zongin tua kum amah siampi lian ahih manin, kamsang bangin a genkhol hi a, Jesu in minam bup’ tang dinga sihna a thuakna ding tham loin,

52. Jesu in mun khempeuh a a kikhenthang Pasian’ tate kaikhawmin pum khat a suahsakna ding zong a genkhol ahi hi.

53. Tua ahih manin tua ni-a kipan amaute in amah a thahna dingun kikumin a vaihawm uh hi.

54. Tua ahih manin Jew mite’ lak ah a kilangin Jesu pai nawn lo hi. Ahi zongin Sehnel gam tawh kinai Ephraim kici khua ah pai a, a nungzuipite tawh tua lai-ah a om uh hi.

55. Tu-in Jew mite’ Paisano pawi kham ding nai ta a, Jew mi tampite in Paisan pawi ma-a biakna ngeina-a kisiansuahna a bawl dingin mun khempeuh panin Jerusalem khuapi ah a paito uh hi.

56. Amaute in Jesu zong uh a, biakinnpi huang sungah dingin, “Bang na ci ngaihsut uh hiam? Pawi sungah amah hong pai lo ding hi, ci-in na um uh hiam?” a kici uh hi.

+Hih in Topa' Lungdamna Laisiangtho ahi hi.

- Christu Topa aw na tungah phatna om ta hen.