Leitung nate pen vantung gam leh tawntung nate zah in manpha lo hi.

Daily Homily by Rev. Fr. Paul Muan Lian (June 18, 2021)

Leitungah ih nuntak sungin manpha ih sak na te, ih deih na te tungah eite in mitsuanin lunglutin eiten ih hanciam hi. Tua manin tuni laisiangtho sungah Topa Jesu in ih mittangin pumpi meivak ahi hi ci-in hong thei sak hi. A cih nopna in ih mit tawh ih et, imuh na te kidop huai hi cih thu ahi hi. Bang hang hiam cih leh ih mit tawh ihmuh na te pen ih lungsim sungah hong teng hi. Mit tawh muhna te sungah lunglutin ih om leh ih lungsim sungah mang nawnlo hi. Ih deihna khat peuhpeuh pen ih lungsim sungah teng sakin ngaih sunsun lehang tua ih deih nate in ih hun tampi, ih tha tampi hong beisakin eite hong valhtum hi. Tua ahih manin Topa Jesu in naneihsa na nakholna munah na lungsim zong a om hi ci-in hong hilh hi. Tua ahih leh eiten bangte manpha sa ih hi hiam?Ih leitung nuntakna sungah eiten ih innkuanpih te ahi zongin, ih it, ih ngaih te ahi zongin sum le pai te ahi zongin, hauhna liatna te ahi zongin thuneihna minthanna thahatna te ahi zongin eiten manpha ihsa kha thei ding hi. Bang hang in tua te manpha sa ih hi hiam? Eite in ih nuntakna sungah lungmuanna ih neih nop man leh ih deih man ahi hi. Leitungah manpha ih sak na te sungah lungnopna, kilemna leh kha muan na om ding ci-in ih lamen hi. Ahi zongin tua leitung na te sungah lungmuan na ih muh sawm leh eiten ih khial ding hi ci-in tuni laisiangtho in eite hong phawk sak ahi hi. Tua leitung nate pen zingsangin hong palh in nitakin a vul pah paak tawh kibang lel hi ci-in laisiangtho hong gen hi.

Tuni lungdamna laisiangtho sungah zong ngetin ne in a kekseu thei hi. Guta ten guthei hi. Kisia thei hi. Bei thei hi. Leitung na te pen vantung gam leh tawntung na te zah in manpha lo hi cih tuni Topa Jesu in lungdamna laisiangtho sungah hong phawk sak hi. Tua ahih manin Topa Jesu in Pasian gam leh ama dikna ih zon masak ding hong zawn hi. Ih mit te in ama tungah tusak ding, amah en gige ding, amah bek mit suan ding, amah bek ih nuntakna sungah masak ding tua hi leh Topa in adang na te akisam bangin eite nuntakna sungah hong behlap in hong vaihawm sak ding hi ci-in Topa in eite tha hongpia hi. Tua mah bangin Misiangtho Paulu in zong bang gen hiam cih leh ka Topa ka theih tel na amanphat luatna hangin nakhempeuh sup ngam zawk dingin ka ngaih sun hi. Ama hangin na khempeuh ka nusia khin aa, Christu ka neih nading in tua nate khempeuh ninbulom tang bang lel in kangaih sun hi ci-in nagen hi. Tua ahih manin amah in ama nuntakna sungah Pasian bek mah nambat khat in nakoihin lungdamna thu a na taangko ciangin gualzawhna picing a nangah hi.

Tua ahih leh eiten vangtungah bang na manpha te khol ding ih hi hiam? Misiangtho Theresa in bang nagen hiam cih leh ,"Ih Topa in ihsepna bangzah in lian hiam cih a enlo hilo hi, itna tawh bangci sep cih thu a en hi. Tua ahih manin bang lau ding om hiam? Banghang in maineu in om ding ih hiam? Pasian itna leh ihgei aa om, ih kim ihpam aa om mite itna in vantungah na manpha a khol ihi hi,"ci-in nagen hi. Tua mah bangin Misiangtho Paulu in zong Laisiangtho masa sungah Pasian a it manin anuntakna sungah haksatna tuamtuam nathuak kha hi. Samin kaihna ahi zong, khemna ahi zong, zawhthawhna ahi zong, pangbetna ahi zong, sim mawh koh gawpna ahi zong, ciangtawh satna ahi zong, thongkiatna ahi zong, sih dektakna zah dong ahi zongin nakpitakin nathuak hi. Tua bangin Misiangtho Paulu in a thuakna in amah in vantungah na manpha te a na kholkhol ana hi gige hi. Tua ahih manin tuni laisiangtho te eiten ih lungngaih kawm in eiten zong vantungah na manpha te bangci khol ding ih hi hiam? Kei in ka nisim nuntakna sungah ngetin anek theihlohna, a kekseu theihlohna ahi vantungah tua na manpha te ka khol theih nading in hih leitung na te bangci zat ding ka hi hiam ci-in ngaihsun kawm in ihkiim ihpam aa om mite tungah itna alak zo te ih hih theih nading in ih hanciam zawh nading hih laisiangtho in hong zawn hi cih phawk tawntung ni.