Leitung bei dong kong ompih ding hi.

Daily Homily by Rev. Fr. Dominic Langh (May 30, 2021)

Laisiangtho masa hun aa kipan pen Jesu min na lawh limlim khak leh sih dan hi. Tulaitak dan in thauvui thautang tawh kingat hilo in sih dan hi lian hi. Roma khua sungah Misiangtho Paulu in Roma mite kiangah Jesu cih pen na kam in pulak inla gumpa ci-in na lungsim in sang lecin gupna nangah ding hi acih pen Topa Jesu min ih lawh limlim nak aa leh ei singam ding acih nopna hi. Tua ahih manin Jesu bek cihna hilo aa, Topa Jesu amin ih lawh limlim aa leh ama aading ih nuntakna piangam ding singam ding cih na hi.

Topa Jesu in leitung bei dong kong ompih ding acih kammal atawpna ih mu aa, tua pen vantung mi Gabriel in Tonu Maria kiangah thu azak sak Topa Jesu hong suah nading thu agen lai in ah, "Ama min pen Emanuel kici ding aa, eite tawh hong omkhawm Pasian cihna hi," ci hi. Tua eite tawh hong omkhawm Pasian ahih leh koici bangin hong omkhawm hiam? Tuni in eite tawh hong omkhawm a hih na pen en koi teng pan mu aa, koi teng pan nuntakpih cih ih et ding kisam hi. Tua ahih manin ih missa sungah ih kipat ciang Pa, Tapa, Khasiangtho min tawh ci aa, singlamteh ciaptehna ih bawl pen tua in nakpi takin manpha hi. Tua ih bawlna hangin To Thum Pasian a pahtawi te ih hi aa, tua missa kipatna bek hilo in Gloria upna kiciamna bulpi te zongah Missa sungah zong To Thum Pasian mah kiphat hi. Tua in To thum Pasian in hong ompihna pen eite in tel in amah aphat, amah abia te ih hihna tuni athak in ih pawlpi sungah kimu hi. Tua mah bangin Topa Jesu in ukna aana teng khempeuh anei pa hi aa, leitungah vak kawikawi in mikhempeuh nungzui suak hen Pa, Tapa, Khasianghto mintawh tuisawpna piak ding hong vaikhakna, tua teng khempeuh pen leitung bei dong in ken kong ompih ding hi, tua nasepna teng khempeuh aman dong kong ompih ding cih hong kamciam ih Topa Jesu ahih manin ih Christian nuntakna ah Topa hong kamciamna te zuizo in tua te nuntakpih ding leh mitampi tak te To Thum Pasian khat upna bulpi sungah upna picing tak aa, alet zawh akal suan zawh nading ahuh apanpih zo te ih suah nading in Topa thupha hongpia ta hen.