Laisiangtho in Pasian kammal ngiat hi aa, Vangnei in vanglian mahmah hi.

DailyHomily by Rev. Fr. Andrew Go Nang (June 17, 2021)

Kong it thuzui nu le pa, U te naute Tuni aa I sim laisiangthote in Pasian tawh I kizopna ah bang cih kizop ding leh Thu ih ngetciangin bangci bangin thungen ding cih Nungzuipi te tung tawn in  Topan hong hilh hi. Pawlpi sungah thungetna leh thupha piakna tuamtuam te ih nei hi. Pawldang dangte tawh ih kibat lohna zong hi pah hi. Hih I thunget nate thu pi-in vang zong nei mahmah hi. Banghang hiam cih leh Topa kiang pan hong pai thuneihna tawh a kibawl thungetna leh thupha piaknate a hih man ahihi( Mt 16: 13-20, Mk 8:27-30, Lk 9: 18-20). Ei RC (pawl te) in Vantung thu ngetna (Mt 6: 5-15, Lk 11:1-13) leh Vantungmi Gabriel in Tonu Maria tungah thu a zaksakna( Lk 1:24 )cih thungetna ih ngen pha mahmah hi. Laisiangtho sungah om in Laisiangtho bangin thu angen ngen ih hi hi. Pawlpi in honghilh na ah Topa Pasian in mun khempeuh ah om in a diakdiak  in hunnamthum sungte le Siampite tungtawn in, eite kiangah hong pai hi ci-in Pasian thu bu Pasian thu I sinna ah hong hilh hi.

Khat na ah, Note keima min suangin Nih leh thum na om khop uh ciangin Note lai zangah ka om hi acih mah bangin kipumkhat in, ki thutuak takin thu ih ngetkhop ciangin Pasian eite laizan ah om hi.(Cf. Mt 18:20)

Nihna ah, Lai siangtho ih sim ciangin Topa Pasian in a ma kammal tungtawnin eite kiangah om hi.

A thumna ah,Missa Biakpiakna I bawl ciangin, Siampite tungtawn in  Topa ei kiangah hongpai in eite tawh om hi ci hi.

A li na ah, Siangtho pumpi sungah ama si le sa ahih manin Topa Jesu in eite tawh om hi.

Tua ahih leh tuni aa Vangtung Thungetna in bang hiam en dih ni. Topa Jesu mah mah in anung zuite kiangah hi bangin ngen un a cih dan lian in aki ngen hi aa, Laisiangtho tawh thu angen ngente ihi hi. Tua in Pasian kammal ngiat hi aa Vangnei in vanglian mahmah hi. Tua sangin a hoih zaw, vangnei zaw, a vanglianzaw thu le a kicing zaw thungetna omlo hi.

Thungetna ih cih ciangin ei mihingte leh Pasian kizopna, ahih kei leh Pasian tawh kihona, Pasian tungah thumna, Pasian tungah lungdam kohna, Pasian minphatna zong kici thei hi. Tuni Lungdamna laisiangtho sungah I Topa Jesu in bangci bangin thungetna in hoih aa,  bangci bang thungetna, hoihlo cih te hong hilh hi. Ei gam sungah enleng thu ngetna ah, a huamthu ngetna, deihsak thungetna, apna thungetna, cih bangin min tuamtuam ihpia hi. Ahi zongin tuni Lungdamna Laisiangtho sungah Topa in thu I nget ciang ih thunget ding thute leh, ih thungetzia ding te hong hilh hi. Pharisee mite ih bat loh na ding leh a kimanglo, khiatna neilo kammal tam pite zangin thunget loh ding Topan hong hilh hi. Pharisee te ahih le siammah mah in mite lung kim nading, mite in amaute a pahtawi nading in Kongzing lamkal ah tangko in ni khat in guk vei bang thungen in, nipikaal khat in ann nihvei thumvei tangin Vantung gam a tun sawmte ahi uh hi. Amaute thungetna te leh asep abawlnate uh mite in amuh theih theih nading abawl te ahi uh hi.

Ei mihingte in thu ihnget ciangin Topa aw, tua hong pia in , Tua nungpiak leh Nangma na kasem ding hi, ahih kei leh ka nasepna hong senpi sakin tua hi leh nang ma nasep nading sum kangah zah lak ah tua zah kong pia ding hi ci-in thu ih ngen thei zel hi.  

A taktakin ngaih sunleng tua ihnget thuphate khempeuh Topa aa hi in, Misiangtho Paulu cih mah bang in thu zong angen thei nailo te ih hi hi.

Pawlkhat bangin thu angetna Pasian bang cih ngaih sun hiam cih leh aw ngaih theithei tawh ngen leh aza deuh, asang deuh ding khawngin ngaih sun in aw ngaih ding aki demdem zong ih om hi. Loud-speaker te zangin angaih thei thei in a awng zong ih om hi. Pasian ih cih pen na khempeuh a thei, na khempeuh a bawl thei Vangliat thahatna khempeuh a kicing Vanglian Pasian hi-in I lungsim athei leh ih lungsim a thupisak Pasian, Ih lungsim tawng aa om ih deihna athei Pasian, Lungsim siangtho tawh ama tungah athum ataute thungetna asang Topa Pasian hi.

Mipawl khatte ngaih sut danin khua a zalo Pasian hilo hi. A beng ngawng Pasian hilo hi.

Tua ahih manin Thu I nget ciangin lungsim siangtho tak leh Pawlpi in thuneihna tawh hong bawl sak thungetna te lungsim takpi tawh angen, tua ih thungetna te tawh Topa hong hilh bangin thu a ngen te leh Ih thunget bangin a gamta te ih suah zawh nangin han ciam ni. Amen