Kei na Topa uh note khempeuh tawh kong omkhawm hi.

Daily Homily by Rev. Fr. Raphael Khuppi (May 22, 2021)

Tuni tuhun laitak kumpi gilo te hanin eite ih lungsim kitam zan dek phial in dah aa lungkham in ih om laitak hi. A hi zong in tuni Topa Jesu eite aading bangthu hong gen hiam cih leh na mailam thu ding dahlua kei in, kei na Topa uh note khempeuh tawh kong omkhawm hi. Kei hong muang un, kei tungah hong kinga un na mailam khempeuh uh kei kiangah hong ap un ci-in eite hong sam hi. Vangik pua aa gim mite aw ka kiangah hong pai un ci-in Topan hong sam hi, tua ahih manin tuni Topa hong sapna kammal te eite za-in ama kiangah vathum ni, ama kiangah vangen ni, ama kiang longal ih muan ding dang omlo hi. Amah in ih lungkhamna vangik te hong suahsak thei pa hi aa, ih mai aa om gal te hong nawk sakzo pa hi, hong zozo sak Topa hi. Tua ahih manin ama kiangah ki-ap in, ama kiangah kibu in, ama kiangah hehpihna thupha te ngen ni.