Kei ma min tawh naupangno khat asang mi-in kei hong sang hi.

Tuni Lungdamna Laisiangtho sungah Topa Jesu in bang ci hiam cih leh kei ma min tawh naupangno khat asang mi-in kei hong sang hi-in, kei hong sangte in kei hong sawlpa a sang hi a cih mah bangin ih kikhoppih, ih ki kholhpih ih lawm ih gualte khempeuh Topa Jesu bangin mu thei-in hi lehang, Topa Jesu amau sungah om hi cih umin, sangin, it thei hi lehang, Pasian in eite thupha tampi hong pia semsem in, ih nuntakna ah zong Pasian deihna bangin nungta in, Pasian thu sungah nuam ih sa semsem ding hi.

Tuni Topa Jesu in eite khempeuh amah bangin kiniamkhiat a, mite tungah thupha bawl a, nasephoih, naseppha, gamtatpha tawh ih nuntak ding hong deih hi. Aana te sangin diktatna, thupha bawlna, kiniamkhiatna, mite ading nahoih napha sepsaknate mailamah anei zo semsem leh ih gam ading, haksatna thuak mite ading thupha bawlna te, hehpihnate apiakhia zo semsem, ahawmkhia zo semsem mite ih hih ding hanciam ni. Topa Jesu in eite hong honkhia, hong gumkhia, thupha hong pia hi.

Pasian in ama mi Isarel te thupha pia a, ahotkhiat mah bangin eite in zong ih kiim, ih paam aom haksatna atuak mite khempeuh tungah lametna apia, kilemna, lungnopna, mawhmai sakna apia zo te ih hih ding kisam hi. Topa Jesu in eite tungah thupha hong bawl bangin tuni Misiangtho Vincent de Paul pawini zong ahih mah bangin amah in micimawh, gentheihna atuak mite tungah ahih theih zahin lametna, huhna apiak mah bangin eite khempeuh zong Topa Jesu nasep mah bangin eima siamna, eima hih theihna khempeuh tawh midangte tungah thupha abawl, gamtatpha tawh anungta zo te ih hih zawh na dingin hanciam ciatni.