"Kei hong angvan ciangin ka mite’ laka ka thuak maimawlna hong lakkhiatsakna ahi hi"

Catholic Nisim Lai Siangtho, Adventu Hun Nipi Kaal (3) Na, Dec 19, 2020 (SAT)

Lungdamna Lai Siangtho (Luke 1: 5-25)

5. Judea gamah Herod kumpi ahih laitakin Abijah(a) siampi nam’ lakah Zechariah(b) min nei siampi khat a om hi. A zi in Aaron’ suan hi a, a min Elizabeth(c) ahi hi. 6. Tuate gel in Topa’ thupiakte khempeuh le zuih ding ngeina khempeuh paubanna om loin a zui uh hi. 7. Ahi zongin amaute in ta nei lo uh hi; bang hang hiam cih leh Elizabeth tasel ahih banah, zong a nih-un a teek ta uh hi. 8. Khatvei ama sehtan hun hong tunga, Zechariah in Pasian’ mai-ah siampi’ na a sep laitakin, 9. siampite’ ngeina om bangin Topa’ mun siangtho sungah lutin lawban hal namtui biakapna a pia dingin amah in thu a ngah hi. 10. Tu-in lawban hal namtui biakapna a piak laitakin mihonpite in a pualam ah thu a ngen uh hi. 11. Tua laitakin Topa’ vantung mi khat ama kiangah hong kilanga, lawban hal namtui apna tau taklam ah a ding hi. 12. Zechariah in vantung mi a muh ciangin lunghimawh-a lau-in a liing hi. 13. Ahi zongin vantung mi in ama kiang ah, “Zechariah aw, lau kei in. Bang hang hiam cih leh na thungetna hong kiza zo hi. Na zi Elizabeth in tapa khat nei dinga, a min John na phuak ding hi. 14. Nang nuamin na lungdam dinga, ama suahna hangin mi tampite zong a lungdam ding uh hi. 15. Bang hang hiam cih leh, tua tapa in Topa’ mai-ah mi lian ahi ding hi. Amah in leenggahzu le kham theih zu dawn lo ding hi. Amah in a suahma nangawnin Kha Siangtho tawh kidim ding hi. 16. Amah in Israel mi tampite, Topa amau Pasian’ kiangah a tunpih kik ding hi. 17. Amah in pate’ lungsim tate’ lamah kiheisak dinga, a thu mang lo mite, midikte’ pilna lampi ah kiheisakin Topa’ aadingin mite a baihsa-a, a koihkhol dingin Elijah’ kha le vangliatna tawh Topa’ mai-ah a pai ding hi,” a ci hi. 18. Zechariah in tua vantung mi’ kiangah, “Kei ka teek ta a, ka zi zong a kum tam ta hi. Hih thu bangci muan ngam ding ka hi hiam?” ci-in a gen ciangin, 19. vantung mi in, “Keimah in Pasian’ mai-a ding Gabriel(d) ka hi hi. Hih lungdamna thu nang tunga a gen ding le nang hong hopih dingin kei hong kisawl hi. 20. Ahi zongin tu-in, hun a cin ciangin a tung takpi ding ka thugente um lo na hih manin hih thu a tun mateng pau thei loin na om ding hi,” a ci hi. 21.Tua hun sungin mipite in Zechariah na ngak uh a, mun siangtho sungah sawtpi a om ciangin lamdang a sa uh hi. 22. Amah hong paikhiat ciangin amaute hopih thei lo ahih manin mun siangtho sungah amah in mangmu ahih lam a thei uh hi. Amah pau thei loin amaute lim bek tawh a khutin a hopih hi. 23. Ama siampi nasep hun a cin ciangin a inn ah a ciah hi. 24. Tua nite khit ciangin, a zi Elizabeth gaii-a, kha nga sung tawntung inn sungah a bucip hi. Amah in, 25. “Hih pen Topa in kei’ aadingin hong sepsak hi a, kei hong angvan ciangin ka mite’ laka ka thuak maimawlna hong lakkhiatsakna ahi hi,” a ci hi.

Hih in Topa' Lungdamna Lai Siangtho ahi hi.