Jesu sisan hangin tatkhiatna leh mawhmaisakna thupha ih ngah hi.

Lk 11 : 47 -54
Tuni Lungdamna Laisiangtho sungah Pasian kammal in thuman in nasemin, ahoih a gamtatna in gualzawhna hong ngah sak hi ci-in ong hilh hi. Tua thamlo in thuman lo a gamtatna in gimna lianpi hong thuak sak hi cih zong ong hilh hi. Misiangtho Paul in ama pumpi ahi Pawlpi sungah Jesu sisan hangin a kicing hehpihna thupha tawh kizui in tatkhiatna leh mawhmaisakna thupha ih ngah hi ci-in ong hilh ngiat hi.
Tua ahih manin Topa’ Pumpi ahi Pawlpi sungah Jesu sisan hangin gupkhiatna leh tatkhiatna nuntakna bucing, a kicing in leitaksa nuntakna leh van nuntakna a kicing in a om na thu zong hong hilh ahih manin ih upna ah lungmuang ni.
Ih upna ah ei leh ei zong misiangtho ih hihna te phawkin ama hong tatkhiatna hangin a kicing hehpihna thupha tawh kizui-in tatkhiatna leh mawhmaina angah te ih hih manin mawhna sungah bual kik nawn loh na ding ih hanciam ding thupi hi ci-in tuni Laisiangtho te in hong hilh hi. Tua ahih manin tuni in ken bang sem ka hiam cih kitel dot a, Pasian misiangtho te ih hih mah bangin ih nuntakna mahmah zong khuavak tate ih hih theih na ding, tuni Jesu in a kicing hotkhiatna, akicing hehpihna ong piak thupha a sang te ih hih manin ih leitung khualzinna tawpna ahi ih tawntung inn ih tun matengin Paul in tai kidemna kung dong hahkat takin ka tai hi a cih mah bangin asiangtho nuntakna tawh nungta dingin Topa’ hong deih hi.