"Jesu in khomun pumnga le ngasa tawnnih la-in, vantung lam ento-a, thupha pia hi"

Catholic Nisim Lai Siangtho, Lungdambawl Hun, Jan 5, 2021 (TUE)

Lungdamna Lai Siangtho (Mark 6: 34-44)

34. Jesu leilak a tun ciangin mihon tampi mu a, hehpihhuai a sa hi, bang hang hiam cih leh amaute a cing om lo tuute tawh kibang hi, a ci hi; tua ciangin amaute thu tampi hilh ding a kipan hi. 35. Ni a tum kuan ciangin a nungzuite ama kiangah hong pai uh a, “Hih mun gam daihna hi-a, tu-in a hun zekai lua ta hi. 36. Hih kima khuaneute ah pai-in a nek ding uh an a lei theihna dingun amaute sawl in,” a ci uh hi. 37. Ahi zongin Jesu in, “Note in amaute’ nek ding khatpeuh pia un,” a ci hi. Amaute in, “Kote pai-in denarii za nih tawh an va lei-in amaute’ nek ding, pia ding ka hi uh hiam?” a ci uh hi. 38. Jesu in amaute’ kiangah, “Khomun bangzah nei na uh hiam? Pai unla, va en un,” a ci hi. Amaute in a et uh ciangin, “Khomun pum nga le ngasa tawnnih a om hi,” a ci uh hi. 39. Tua ciangin Jesu in mi khempeuh lopa hing tungah a pawlpawlin a tutsakna dingun a nungzuipite thu a pia hi. 40. Tua ahih manin amaute pawlkhat za, pawlkhat sawmnga, cih bangin a pawlpawlin a tu uh hi. 41. Jesu in khomun pum nga le ngasa tawnnih la-in, vantung lam ento-a, thupha pia-in, khomunte balnen a, mipite’ mai-ah a lui dingin nungzuipite a pia hi. Ngasa tawnnih zong amaute khempeuh lakah a hawmsak hi. 42. Tua ciangin amaute khempeuh in a kham takun a ne uh hi. 43. Tua ciangin a nungzuipite in khomun le ngasa, a neng a themte khawm uh a, seng sawm le seng nih dim a ngah uh hi. 44. Tua khomun a ne pasal cingteng tul nga a pha hi.

Hih in Topa’ Lungdamna Laisiangtho ahi hi.