Itna, hehpihnate bulphuhin na isep leh tua tungtawn in thupha hong luang ding hi.

Daily Homily by Rev. Fr. John Mang (June 16, 2021)

Pasian in bang deih hiam? Bangci thunget ding, bangci antang ding leh bangci bangin citpiakna te bawl ding ih hiam cih tuni laisiangtho sung pan honghilh nuam ahi hi. Tua te sungah itna ih neih ding Pasian in deih hi. Hehpihna ih neih ding deih hi. Lainat pihna te ih neih ding deih hi. Thusiamna leh citna te tawh na asem dingin Topan tuni nang le kei hong zawn hi. Pasian in kiniamkhiatna zong deih hi. Amah ih zahtak ding leh athu ih man ding zong deih hi. Hih thu te bulphuhlo in thungetna, antan na, citpiakna te in amawkna suak ding hi.

Tua ahih manin thupha bawlna te ih neih ciang, thu ih nget ciang, antan na pumpi kidekna te ih neih ciangin itna, hehpihna te bulphuh in na ih sep leh ih nasepna tung tawn in thupha hong luang ding hi cih tuni laisiangtho kammal te in hong theisak nuam ahihi. Tua ahih manin bangbang ih sem zongin kuamah in hong phat sese ta kei leh kua mah in hong pahtawi sese ta kei leh, hong kimu ta leh hong kimu ta kei leh, lungsim siangtho tawh Pasian zahtakna leh ih veng ihpam agen thei te itna leh hehpihna deihsakna takpi tawh thunget sakin, antangin, citpiakna bawl in, Topa maipha zongin amah zahtakna tawh na asem dingin tuni Topa Jesu in nang le kei hong zawn hi.