Ih nuntakna sungah kiging kholsain om ding kisam mahmah hi.

Tuni Laisiangtho in Pasian ih upna cihtak ding, ih sepna peuhpeuh ah citak ding, thuman ding, ih kiginkholh ding ih hanciam ding hong deih hi. Tua ahih manin na khat peuhpeuh ah lungkia baih, thanem baih lo-in ih kalsuan ding kisam hi. Tua hi leh ih thungetna ah haksatna, ih sep ih bawlnate ah haksatna, ze-et nate ih kan tan zo ding hi. Dawimangpain ih thungetna te hong nawngkai sak hi. Ahi zongin  Vantung thungetna leh Ave Maria thungetna te in dawimangpa ahi zongin hong bawlsia thei kha gilote linglawng sak hi ci-in Misiangtho John of the Cross te khawng in hong gen hi. Thu ih nget ciangin Pawlpi’ hong hilhsa, hong at saksa te bek hi lo-in ih lungsim mahmah tawh deihna mahmah tawh thu angen thei te ih hih ding kisam hi. Misiangtho Monica in lungsim takpi tawh Topa nazongin Topa kiangah thu nangen in ama deihna ahi, a tapa kikhelna dong atun sak mah bangin ei thuzui ulenau, nulepa akua mapeuhin thu ih nget ciangin lungkia baih lo-in ih thungetna te ah hanciamin citakin kalsuan ni. Ih thungetnate in amawkna suak ngei lo hi. Ih thungetnate in na hong kilamdang sak hi cih um in ei te in na khat peuhpeuh ih sep ciangin kiginkholhna, cihtakna, hanciamnate tawh kalsuan tawntung ni.