Ih nuntakna ah leitung ci,khuavak ihih theih nading thukingetsak ciat ni.

Daily Homily by Rev. Fr. Maximian Mungpi (June 8, 2021)

Tuni Lungdamna Laisiangtho sungah Topa Jesu in ei Christian thuzuite vaipuak dinmun leh eima ID bangci bangin om hiam cih thu hong thei sak hi. Tua te in bang hiam cih leh note in leitung khuavak te leitung ci te nahi uh hi ci-in hong thei sak hi. Ei nisim nuntakna sungah ih et ciangin ci te in bang hong nei sak hiam cih leh nisim nuntakna ding aa ih bawl nek le dawn te ah ci in ankam limna hong nei sak aa, tua mah tawh vante nek theih te kikem leh sawt veipi kikoih thei hi. Tua ahih manin Topa Jesu in ci in a alna bei leh bangin kizang thei ding hiam ci-in hong gen mah bangin eiten ci mah bangin ih omna mun ciat ah mite a lungkim sak thei, khat le khat kizawpna te ah alem taang sak thei tanu tapa te ih suah zawh nang ci bangin al na ih neih ding kisam aa, tua mah bangin Pasian kiang pan ih ngah sa Pasian kammal, Pasian itna gupna thupha te zong kiptakin eiten ih kep zawh ding ci bangin ih al ding kisam hi.

Tua mah bangin eima nuntakna sungah ci bek tham loh in khuavak mah bangin eima gamtat hoihna, kampau na te tawh mite khuavak hoihna, phatna amu sak zo tanu tapa te ih suah zawh nang zong Topa Jesu in hong thei sak hi. Tua ahih manin eite Christian nuntakna in mimal khat ciat nuntakna sungah eite in leitung ci te hi hang aa, leitung khuavak te ih hih na thu, thuzui khat ii panmun dinmun leh eima ID pen leitung ci, leitung khuavak ahi hi.

Hih laisiangtho sungah ih et tak teh bang mukhia i hiam cih leh khuaimei sa leh lalcin kivaksa lawh nuai ah kikoih lo cihna lawh, meivak tunna cih namnih om hi. Lalcin cih tak teh eiten Pasian kiang pan ihngah sa Pasian kammal hi aa, tua kammal anungtak theih nangin lalcin zong ama guak taang theilo hi. Lalcin ataang theih nangin atui akisap mah bang aa eite nuntaakna sungah zong Pasian kiang pan ihngahsa kammal te anuntak theih nangin ih hahkat ding, Pasian kammal tawh ih zop den ding thupi hi.

Lawh cih ciangin aki vaksa khuaimei pen lawh nuai ah kikoihlo lawh in bang gen hiam cih leh tua khuavak a nawngkaai sak thei leitung mihing ngeina, ngaihsutna te nuai ah tua ih ngahsa Pasian kammal pen kikoih ngeilo ding aa, tua bang koihna in Pasian kammal pen eiten a nen niam tawh kibang hi. Tua sangin meivak tun na ahi khasiangtho tungah eite kinga in Pasian kammal ih ngahsa te tungtawn in khasiangtho tawh eite ih nisim nuntakna sungah khasiangtho sungah ih kibual ding, khasiangtho tawh nuntak pih ding, khasiangtho makaihna zui in thuman thutak sung leh kilemna, kipawlna sungah ih nuntak ding tuni Topa Jesu in hong thei sak hi.