Ih mawhna pan kisikkik in, a thak nuntakna te ih neihzawh nading.

Tuni Laisiangtho in Topa ii thu genna te za-in, zui-in, ih mawhna pan kisikkik in, a thak nuntakna te ih neihzawh nading hong hilh hi. Tuni in ei Christian te in vaipuak lianpen ih nei hi. Topa in ama itna, hehpihna te midangte tungah apuak dingin eite hong sawl hi. Ama ii vanzat, sawl tangzang dingin eite ong deih hi. Pa Pasian leh Topa Jesu kikal ah aom dingin eite hong lamto hi. Tua mah bangin midangte zong Pasian in ama vanzat dingin eite kiangah hong sawl thei hi cih zong ih phawk ding ahi hi. Tua ahih manin midangte tungpan in, Pasian mizat te tungtawn panin Pasian in eite kiangah ong gen thu te zong eite in za-in, ngai-in ih zuih ding kisam hi. Anawlh mite, anial mite ih hihna tawh Pasian anial, Topa anial ih hih khak loh ding, tuni eite ih kidop ding ahi hi. Tua hi a, Pasian ong sapna te tungah eite in lungdamko kawmin tua ong sapna te eite in upna leh cihtakna tawh azui leh asemkhia te ih hih banah Topa in eite kiangah a hongsawl mite hong gen thute, eite in kiniamkhiatna tawh ngai-in, zui-in ih nuntakna te aki khel lawh, Pasian lamah anehpih mite ih hih ding tuni Laisiangtho in eite teltakin hong gen hi. Tua ahih manin Pasian aw kalungsim sungah lungsim siangtho hong guan inla, athak aman ngaihsutna kasungah hong guanine. Nang hong nial mi hi lo-in, atawntungin nang hong sang mi hong hi sak ta in ci-in Topa tungah a ki-ap tawntung te ih hih zawh na dingin akisam thupha te Topa in mimal khat ciat tungah hong pia ta hen.