Hongcing hongkem vantungmi te pawini

Tuni pen ih Nu Catholic Pawlpi in (The Holy Guardian Angels) ei hongcing hongkem vantungmi te pawini hong bawl sak hi. Hih hongcing hongkem vantungmi te ih neihna pen Laisiangtho lui sungah hitaleh Laisiangtho thak sungah hitaleh, tanglai pek in zong ih pawlpi in ana zuih sa uh hi cih ih phawk ding kong deih hi.

Tuni Lungdamna Laisiangtho sungah hih naupangno khat bangin lungsim kiniamkhiatna na neih kei leh vantunggam tung lo ding, naupangno te bangin lungsim kiniam khiatna anei mi, itna anei mi peuhmahin vantung gam ah alian pen hi ding hi ci-in hong gen hi. Tua ahih manin ei hongcing hongkem vantungmi te ih phawk kawmkawmin vantung mite hong cing hongkepna, hong lamlahna te ih zuih theih nading in lungsim kiniam khiatna kisam hi.

Tua ahih manin mikhempeuh tungah akibangin it zawh ding, mite bawlsiat nopna lungsim nei lo ding. Lungsim hoihlo in vantung mite hongcing hongkepna hong khaktan hi. Vantung gam ih tun ding hong khak tan hi cih phawkin tuni hong kem vantungmi te pawini ih bawl ni-in eite khat ciatin lungsim kiniam khiatna tawh naupangno te bangin itna nei-in, lungsim kiniam khiatna nei-in Pasian maipha ih muh zawh nang hanciam ni.