Homily By Rev. Fr. Thomas Tuang (Jan 20.2022, Thur)

(Mk 3: 7-12)
Tuni Lungdamna Laisiangtho sungah Topa Jesu kiangah mi tampi hong pai uh hi. Bang hang hiam cih leh Topa Jesu in thugen siamin, natna tuamtaum te damsak ahih man hi. Tua bek thamlo a kibawl thei lo natna tuamtuam te na ngawn amah tawh a ki muh ciangin damna ngah uh hi. Tua ahih manin Topa Jesu minthang mahmah in mun tuamtuam pan hong pai mite in anawk gawp loh na dingin anungzuite kiangah Ngunkuang khat bawl sak hi.
Tuni in mi tampite Topa Jesu kiangah apai mah bangin eite zong ama kiangah I pai ding ahi hi. Upna tawh I pai ciangin, upna tawh amah I lawng ciangin eite in Topa Jesu kiang amawkpai hi nawn lo-in, I khut guak tawh a lawng hi nawn lo-in I upna tawh apai I hih manin ama sungah upna lianpi a neite, itna lianpi a nei te I hih manin tua in eite nuntakna ah na lamdang hong kilangsak hi.
Tuma kum (2000) val lai-in Topa Jesu Galilee kim ah apai na te ah miten azuat ziahziah bangin tu hun ah zong ki zuan ziahziah kha ding hi. Topa Jesu in apumpi tawh hong om loh hangin a Pawlpi sungah a kammal tawh hong om hi. Sacramentu te tawh hong om hi. Tua ahih manin eite in I sep I bawl peuh, upna takpi leh lametna takpi tawh I sep I bawl ding, I kalsuan ding pen nakpitak in thupi hi.
A diakdiak in a siangtho biakpiakna I bawl ciangin upna lianpi tawh, zahtakna lianpi, itna lianpi, lametna lianpi tawh I ki hel ding thupi hi. Topa Jesu upna tawh I lawng ciangin I kha, I taksa hong damsak ahi hi. Eite ading a thupi in bang hiam cih leh upna kip I neih ding kisam hi. Upna kip I neih kei leh Laisiangtho in eite adingin man neilo ding hi. Pasian kammal bangzah ta in ki gen ta leh eite adingin man neilo ding hi. Upna mit tawh eiten Topa I muh theih na dingin apawlpi tungtawn in I et ciangin Siadawte, Siampite, Pasian nasemte, Pasian thu tangko te tungtawnin Topa hong itna, hong hehpihna te a zaza te I hi hi.
Tua te eite in I thaksuahsak ding, I no suahsak ding nakpitak in thupi hi. Tua bangin I thaksuahsak na dingin Topa tungah I kingak kul hi. Itna ngaihna te tawh I kalsuan ding ahi hi. Tua hi leh eite in Topa nungzuite, Topa mite ci-in ei leh ei ki ngaihsun in mite mai ah zong I hih zo ding hi. Topa kammal te I zak ciangin nuamna, lawpna tawh I san ding kisam hi. Upna tawh I lak ding kisam hi.
Tua hi leh eite in Topa deihna tawh kituak in nungta zo in itna, ngaihna, lametna tawh mainawt zo ding hi hang. Tuni a vanglian Topa kammal te I zak khit ciangin, I ngaih khit ciangin I nuntakna ah a kemcing ding, a zuizo dingin Topa sungah ki-ap ni, Topa sungah nuntaksawm ni.