Homily By : Rev. Fr. Thomas Tuang, (Immaculate Conception ( 8.12 .2021)

Lk 1 ; 26 – 38
December 8 ni, Tonu Maria mawhcilna neilo ahihna pawi pen Catholic Pawlpi in kumsim in a bawl den pawi khat ahi hi. Tonu Maria tawh kisai in RC Pawlpi in up ding, san dingin atangko uh Dogma (4) om-in, tua te ah, (1) tuni aa akibawl Tonu Maria mawhcilna neilo ahih na, (2) Tonu Maria in a tawntung aa a siangtho ahih na, (3) Tonu Maria Pasian Nu ahih na leh (4) Tonu Maria a Pumpi leh Kha vantungah a kilaktohna te ahi hi.
Tonu Maria in mawhcilna neilo in piang hi cih pen Christian tradition ci-in, RC Pawlpi kipatcil akipan Tonu Maria pen asiangtho tawntung hi cih upna kinei hi. (Pian 3 : 15) sungah Numei suan leh Gulpi suan te kikal ah kilangpanna om ding hi ci-in ki mu thei hi. Tua sunga numei in Tonu Maria hi. Tua Pasian kamciam pen a zenzen in Tonu Maria mawhcilna tawh kipelh kei leh a siangtho kei leh piang thei lo hi. Pian 3 : 15 ih et ciangin Tonu Maria in gulpi pen a khenuai ah tuancil hi. Tua thu ih et ciangin Pasian vangliatna Tonu Maria tungah bangzah takin lian hiam cih ki mu thei hi.
Lk 1 : 26-38 sungah “Akhang akhangin mikhempeuh in thuphangah nu hong ci ding hi” ci-in gen hi. Vantungmi in Tonu Maria a notset lai-in zong thupha tawh kidim nu ci-in na hopih hi. Tua ah bang ngaihsun ding ih hiam cih leh mawhna nei hi leh thupha tawh kidim thei lo ding hi. Mawhna banglo, mawhna neilo, mawhna tawh kisai kha lo ahih manin, Pasian in a teltuam vilvel ahih manin thupha tawh kidim nu ci-in Vantungmi Gabriel in na nanotset hi.
Tuni eite in hih athupi pawi ih bawlna hangin ei ii leitung aa ih Nu te in ta te hoih ding hong deih mah bangin, a pil ding leh thupha tuamtuam te tawh kidim ding hong deih mah bangin ih vantung Nu Tonu Maria in ei atate asiangtho ding, Pasian thu a um ding, Pasian thu azui ding, Pasian deihna bangin a zui dingin hong deih ahih lam tuni-in phawkni. Tua mah bangin Tonu Maria in mawhcilna neilo in a piangna pawi ih bawlna hangin eite in zong Tonu Maria ii siangtho na te et-teh in, ahoih thei pen in Topa deihna tawh kituak in anungta zo den, a siangtho taka akalsuan den, Pasian deihna te tawh mai anawt den te ih hih ding thupi hi.
Eite nuntakna ah Tonu Maria ih lungsim sungah ahi zongin, ih nuntakna sungah ahi zongin ih et-teh dingte et-teh in, ama tungah muanna tawh thu hong ngetsak in ci-in ih nget ding ahi zongin, a tapa kiangpan ih deih thupha te amah tungtawnin ngen lehang, “Tonu Maria tungtawnin Topa Jesu kiangah” cih masuan in eite in thungen tawntung lehang tuni ih bawl pawi-in eite adingin man nei ding hi. Asiangtho Tonu Maria asiangtho mah bangin Topa Pasian in mimal khat ciat asiangtho dingin thupha hong pia ta hen.