Homily By Rev. Fr. Thomas Tuang (Feb 10.2022, Thur)

Mk 7 : 24 – 30
Tuni Lungdamna Laisiangtho I et tak ciangin Topa Jesu in Tyre leh Sidon khua te ah pai hi. Topa Jesu in inn khat ah a lut ciangin mite theih loh dingin deih hi. Bang hang hiam cih leh Topa Jesu pen na lamdang lak pa ci-in a minthang ahi hi. Pasian thu umlo te, Jew te in Topa Jesu pen na lamdang lakpa ci-in a muh uh ahi hi.
Tuni in Topa Jesu in Greek te tenna mun ah hong pai-in kua mah a ki theihsak noploh hangin a na thei veve na om hi. Greek numei, Syria gam, Phoenicia a piang numei khat in Topa Jesu mai ah khukdin in a tanu damna angah nading, dawi matna pan a suahtak nading hong ngen hi. Upna, muanna lianpi tawh a thum ciangin Topa Jesu leh hih numei nu kikal ah amau ki ho na I et ciangin bang mu thei I hi hiam cih leh Topa Jesu in hi numeinu a thusimlo bangin om masa hi.
Tua numeinu in Jew minam hi lo hi. Topa Jesu nasepna pen Jew minamte a ding hi masa hi. Minamdang te ading hi masa lo hi cih a gennopna in bang ci hiam cih leh naupangte an piak masak ding kilawm hi. Naupangte nek ma in ui te ki pia lo hi ci hi. Naupangte a cih nopna in Jew te damsak masa ding, lungdamna thu tangko masa ding, Jew te kiangah vantunggam thu tangko masa ding ci-in a gennopna ahi hi.
Ui ci-in a gen ciangin hi numei nu pen Jew minam hilo ahih manin Gentile mi ahih manin a siangtho lo ci-in a gentehna ahi hi. Jew te in minamdang te pen a siangtho lo in a mu uh ahi hi. Ahi zongin hi numei nu ii upna, muanna bangzah in lian hiam cih leh uite nangawn in khateh nengkia te tawm buang hi lo hiam ci-in dawng hi. Ui tawh ki genteh phial mah taleh hi numeinu ii upna Topa Jesu in a muh ciangin na lunggulh bangin hi ta hen. Tu in ciahin, na tanu dam khin hi ci hi.
Tua ahih manin Topa Jesu in upna lian mahmah Gentile numeinu ii upna hangin a tanu damna a piakna thu tuni in I lungngaih bulpi pen ahi hi. Topa Jesu in mite ahuh nopna, a damsak nopna pen apaina peuhpeuh ah lak kawikawi hi. Topa Jesu tungah upna, muanna anei te pen cik mah hunin guaksuak lo hi cih pen hi numeinu tungtawn in ki mu thei hi.
Eite in zong tuisawpna Sacramentu hangin Pasian tanu tapa te I hih manin I kisapna mun te ah hi Gentile numeinu ii upna muanna te, lametna te, cihtakna te phawkin eite zong Topa tungah ki ngak siamni.