Homily By Rev. Fr. Raphael Khuppi (Dec 11, 20211)

Mt 17 : 10-13
Tuni I lungngaih ding Lungdamna Laisiangtho pen Mt 17 : 10-13 na sung ahi hi. Topa Jesu pen Meelkikhelna mual tung panin nungzuipite tawh hong tuak suk kik uh a, lampi ah nungzuipite in a theih nop thu pawl khat Topa Jesu kiangah dong uh hi. Topa Jesu in zong amau theih nop thute limtakin dawng kik hi. Nungzui I cih a khiatna pen a theinuam, a kan ahih kei leh a sin cihna ahih mah bangin Topa Jesu nungzuite zong Topa nung azui mawkmawkte hilo-in ama thu a thei nuam, amah akan leh ama kiang pan thuman thutak a sin te ahi uh hi.
Tua ahih zah khatin tuin zong Nungzuite in Topa Jesu kiangah, “Tua ahih leh bang hangin Laisiangtho siamte in Elijah hong pai masa ding hi,” ci uh ahi hiam? ci-in dong uh hi. Hih mun ah Elijah I cih pen Laisiangtho lui sungah Prophet minthang mahmah khat ahi hi. A minthanna a hangin, amah pen Pasian tawh direct in kiho thei uh aa, Pasian in a na sepna te amuh teh paakta mahmah a hih manin leitung sihna tawh kisawh sak lo-in, a hingtangin vantung gam ah la to hi. Tua bangin ahingtang in vantung a tung pen Piancil sungah zong khat om a, amah pen Enoch ahi hi.
Elijah thu tawh kisai Prophet Malachi in, “En un, alian a lauhuai Topa’ Ni hong tun ma-in note kiangah Prophet Elijah kong paisak ding hi,” ci-in BC 500 kiim pawl in a genna thu (Malchi 4: 5) sungah ki mu thei hi. Tua ahih manin Jew minamte’n Elijah hong pai kik takpi mah dingin lam en uh hi. Messiah hong pai ma limlim in Elijah hong paikik ding, hong kilang kik ding hi, cih pen amau upna ahi hi. Lam khat pan in, Elijah hong pai masa lo-in, Messiah hong pai ngeilo ding cih pen amau sanna ahi hi.
Ahi zongin amau theih khak loh thu in, Elijah pen Tuiphumpa John limlehmel tawh hong pai khin gige cih thu ahi hi. Topa Jesu in anungzuite kiangah, na khempeuh a bawlpha dingin Elijah hong pai masa khin takpi hi; ahi zongin mite in amah theilo uh ahih manin ama tungah a utut-un bawl uh hi. Tua mah bangin mihing’ Tapa zong bawlsiatna thuak ding hi, ci hi.
Hih thu a gen ciangin Nungzuipi te’n Topa Jesu in bang a gen nuam hiam cih thei pan uh hi. Elijah pen Elijah lian in hong pai nawnlo, Tuiphumpa John limlemel sungah hong pai khin ta, Messiah hong pai na ding lampi sialin, sehnel gam sungah kiko khin ta, kisikkikna thu genin Jordan gunah mitampi tuiphum khin hi. Tua hi na pi-in amah pen Messiah hong pai na ding lamsialpa, mataipa ahih lam kitheilo, kitheih mawh bawlin ki bawlsia in ki that laizen hi. Tua mah bangin kei zong a thuak ding ka hi hi ci-in ahilh cian pha mahmah ahi hi.
Ute naute aw tuni dong mah Jew minam te’n Elijah hong pai nailo mah sasa lai uh ahih manin Jesu Christ hong pai khit hangin Messiah gumpa in sang zo nai lo uh hi. Amau adingin Christmas om nailo hi. Ahi zongin ei adingin ahih leh tuma kum 2000 val hun laipek a hong pai Messiah gumpa phawkna tawh kumsialin amuak kikkik I hi hi. Tua ahih manin ei adingin Elijah zong lam et kul nawn lo a, Tuiphumpa John zong lam etet kul nawnlo hi. Hong pai nading lampi na sial nak leh nang sungah, na lungtang Bawngkuang sungah Naungek Jesu in mun hongla in hong kisial dinga, Christmas pen nang adingin a limci penpen hong suak ding hi.