Homily By : Rev. Fr. Raphael Khup pi. ( Nove 20, 2021)

Lk 20 : 27 – 40
Tuni pen Hunnautang nipi 33 na sungah kigin ni hi a, zingciang in Jesu Kumpipa pawini hong tung ding hita hi. Biakna kum zong a bei kuan hong hita a, kum simin ih ngaklah phadiak ahi, Christmas pawi bawl na dingin kiginna Adventu hun hong tung kuan ta hi.
Tuni I sim Lungdamna Lai Siangtho pen Luke gelh Lungdamna Lai Siangtho sungpan hi a, Topa Jesu in kum 3 sung a nasepna te a hial bawlbawl hita hi. Tua bangin a hial bawl ma-in anungzuipite tawh Jerusalem khuapi lam zuan in hong pai uh hi. Hong paina lampi ah a ngeina mah bangin lungdamna thu mah hong tangko kawmkawm hi. Ama thugen za-in asang, anungzui mitampi a om mah bangin, asang nuamlo, a nial leh a mawhsak zong mitampi mah na om hi. Tua bangin a sang nuamlo mite lak ah, Laitheite, Pharisee te leh Saducee te zong kihel uh hi. Amaute pen Jesu kiangah hong pai uh hangin ama thugen a zanuam a ngai nuam hilo uh a, Jesu amawhsak nopman, a thangsiah nop manin hong pai hizaw uh hi. Hih in bang hong phawksak hiam cih leh, Biakinn I pai ciangin mi mawhna a zong dinga pai I hi kei a, a nungta Pasian hoihna a ciam ding, Pasian hoihna a phat ding leh Pasian Kammal tawh Kha tha adim dingin a pai hizaw hihang cih phawk ding ka deih hi.
Ahih leh, tuni mawh zong nuam a hong pai Suducees ten Jesu kiangah bang thu va dong uh a, Jesu in bangci dawn kik hiam cih tawm khat en ni. Tua I et ma-in Saducees I cih te kua te hiam ci hen masa ni. Saducees te pen Jew minam sung mah pan hi uh a, misite thawhkikna a umlo pawl ahi uh hi. Hih thu ah Pharisee te tawh a san dan uh ki keelki lian hi. Pharisee te’n ahih leh thawhkikna om hi cih um uh hi. Hih bangin up dan leh san dan a kibanglo mipawl nihte kikal ah thu hilh ding pen baih lo hi. Khat lam na mawh sakin khat lam na man sak leh, na mawh sakna lamlam in nang hong mudah ding hi pah hi.
Ahi zongin Jesu in tua mite dotna tungtawnin a ma gennop thuman thutak in bang hiam cih tawh amaute thu hilh kik hi. Amaute dotna ah, unau pasal sagih om a, a u pen pan zi nei hi. Ta nei man nai lo-in si hi. Jew minamte ngeina ah anuapa in tua a sanggampa zi, meigong nu pen tenpih hamtang ding cih thu hi. Anau pan zong tenpih a, ta nei manlo mah in sih san leuleu hi. Tua bangin unau sagih in numei khat a tenpih khitteh a unau un si khin uh a, meigong nu bek cian lai hi. Thawhkik ni ciangin tua meigong nu pen kua zi hi ding hiam ci-in dong uh hi.
Hih mun ah Jesu in Pasian pen a site’ Pasian hilo a, anungtate Pasian hi, cih thei sak masa hi. Tua khit ciangin Vantung gam ah mihing ngaihsut bangin kiteeng kipi cihte omlo dinga, vantungmite tawh ki bang khin ding hi, ci hi.
Ute naute, Pasian pen, Abraham Pasian, Isaac Pasian leh Jacob Pasian hi a, a si Pasian hilo hi. A Tapa Jesu mahmah zong Thawhkikna leh nuntakna hi a, amah a um mi khempeuh nitawpni ciangin tho kik ding hi, ci hi.
Tua banah, thawhkik khit ciangin mihing ngaihsutna khempeuh bei in vantung thu bek tawh ki nungta ding hi cih hong hilh hi. Leitung ah mihing I hih manin mihing lungsim ahi, duhhawpna, huaihamna, hehna, hazatna, mitawh mawhnopna cihte ki nei a, ahi zongin vantung I tun ciangin tua te khempeuh bei siang dinga, itna bek tawh ki nungta ding hi. Vantung I tun ciangin upna, lametna cihte kisam nawnlo ding a, itna bek kip pai suak ding hi.
Tua ahih manin, leitung ah I nuntak sungin amai mang ding leitung thute, leitung nate tawh buai zawlo in, tawntung gam nuam hong tunpih ding, vantung thute mah mitsuan in I nuntak zawh na ding han ciamni. Jesu in Lampi, Thuman thutak ahih mah bangin ama thu bek mah pomin ama hong sialsak lampi mah tawnin nuntak tawntungna gam a manawh den I hih theih na dingin thungen in hanciam ciatni.