Homily By Rev. Fr. Raphael Khup pi (Jan 22. 2022, Sat)

Mk 3: 20 – 21
Tuni Lungdamna Laisiangtho sungah Topa Jesu in ama nasepna te ah alungsim khempeuh diahin sem ahih manin mi tampite in amawhsakna thu hong thei sak hi. Hi pa pen a hai hi cihzah dongin mudahna, gensiatna na ngah hi. Tua bek thamlo in ama ii khuapih te, a sanggamte nangawnin ama I nasepna akawl na dingin a sam dingin hong pai uh hi ci-in Laisiangtho sungah I mu hi.
Pasian na I sep taktak ciang ahi zongin, Pasian sungah anungta taktak te in, amau nuntakna sungah Pasian sungah ki-nga in, Pasian sungah nuamsa in, thungetna te ah nuamsa in lunglut in, Pasian nasepna ah thasial lo-in anuntak tak ciangun amaute in mite gensiat ding pen ngaihsun kha nawnlo in Pasian tawh nuamsa ngiat uh ahih manun, amau nopsakna pen tuni Topa Jesu mahmah in eite hong lak hi cih I mu thei hi.
Topa Jesu adingin asanggam te, a beh a phungte in alung hihmawhsak na thu nam (4) om hi. Hi thu nam (4) te in bang teng hiam cih leh Topa Jesu in ama ii Pasian nasepna, lungdamna thu tangkona a kipat tak ciangin, a Pa nasep ahi khutsiam nasep pan, income tampi ngah ding himah tase leh tua te nusia in mundangah pai-in bangmah a kingah lo lungdamna thu tangko hong kipat manin a sanggamte na lunghimawh hi.
Anihna ah mite in apawlbawl hetloh, amuhdah, a nawlkhin ahi siahdongte hitaleh, mawhneite tawh kikhawl zawsopin leitung mite ii pi et ahi, mipil misiam vangnei, za neite tawh a kipawl loh tak ciangin a sanggamte lung himawh hi.
A thumna ah amah in thu a gen tak ciangin mi khempeuhte lungkim nading bek hi lo-in, amanlo thu amuh leh hangsan takin kawk ngam hi. Tua kawk ngam mite lak ah kua te pa hiam cih leh Pharisee te leh lai thei te ki hel hi. Hi te pen mite pimuhte hi-in amau khialhna pen kuamah in kawk ngamlo uh hi. Ahih hangin amah in kawk ngam, gen ngam ahih manin a sanggamte lung himawh hi.
A lina ah amah Messiah ahih lam miten a theih loh banah amahmah in Messiah ahihna pen akam tawh a gen lianloh hangin gamtatna tawh thuman thutak a gen na, leitung khuavak ahihna te nalamdang tuamtuam a bawlna tawh hong lak ciangin a sanggamte lung himawh uh hi. Ahi zongin Topa Jesu in ama sep ding, bawl ding te nusia tuanlo in sem paisuak hi.
Topa Jesu ii nasepna ah vangtung gam thu, lungdamna thu ahih nak a leh amah in launa om lo-in sem hi. Eite in Christian I hihna tawh Topa Jesu nungzui I hih mah bangin ama khekhap zui-in, amah mah bangin vantunggam thu, lungdamna thu te tangko in I kam tawh ahi zongin, I nuntakna tawh ahi zongin tangko in mite ii gensiat ding lau lo-in thuman thutak tawh anungta, a gamta, leitung khuavak taktak te, mite tungah khuavak a puak zo te I hih zawh na dingin a thakin ki hanthawn hang.