Homily By Rev. Fr. Raphael Khup pi (Jan 15.2022, Sat)

Mk 2: 13-17
Tuni Lungdamna Laisiangtho sungah Topa Jesu in siahdongpa ahi, Alphaeus’ tapa Levi a sapna thu I za hi. Topa Jesu in hi leitungah hong pai na bang hiam cih pen hi thu tungtawnin ki mu thei hi.
Topa Jesu in hi leitungah mi amawhsak dingin hong pai hi lo-in, mite mawhna amaisak dingin hong pai ahi hi. Mite van asuan ding hi lo-in, mite vanpuak azangsak dingin hong pai hi. Mite ahehsak adahsak ding hi lo-in, mite dahna lungdamna tawh alaihsak dingin a hong pai ahihna thu hih Laisiangtho mun pan hong thei sak hi.
Topa Jesu in ama nasep ahi lungdamna thu tangko in avak kawikawi na ah siahdongna munah a tu ahi, Alphaeus’ tapa Levi (Matthew) amuh ciangin thakhatin na sam pah hi. Matthew in zong lunghiang lo-in thakhat in na zui pah hi. Azuih bek thamlo in tua nitakin Topa Jesu leh a nungzuite ama inn ah an limtakin na vak lai hi.
Matthew pen Jew minamte’ muhna ah mawhnei mi khat in a ciapteh uh ahi hi. Banghang hiam cih leh amah pen siahdong hi a, Roma kumpite adingin na asepsak, a minamte alehhek ci-in mite muhna ah mawhneimi ci-in a kiciamteh mi khat ahi hi. Ahi zongin tuni Topa Jesu ama innah hawhin, anne in tuidawn in a om tak ciangin Pharisee te in lamdang sa uh hi.
Banghangin hi mipa kiangah pai ahi hiam cih Topa Jesu kiangah direct in dong ngamlo in anungzuipite kiangah na dong uh hi. Hih dotna Topa Jesu in thei ahih manin ‘A cidamte in siavuan kisamlo uh a, cinate bek in a kisam uh hi; kei mah in midikte a sam dingin hong pai ka hi kei a, mawhneite a sam dingin a hong pai ka hi hi’ ci-in na dawng kik hi.
Thuzui ulehnaute aw, leitung mitmuhna ah akhial pen te leh amawh penpen I sak te in Pasian mai ah a kilawm penpen te zong hi thei hi. Banghang hiam cih leh Topa Jesu in tua mawhnei mite a sam dingin a hong pai ahih man hi. Kei mawhkeng, khial keng a ci ngam kuamah om lo kha ding hi hang. Mihingte khempeuh pen mawhna ii sila I hi hi. Mawhna hong tuamin nisim in lungsim tawh hitaleh, I mit tawh hitaleh, I bil tawh I kam tawh hitaleh, gamtatna tawh hitaleh mawhna sungah I om kha zelzel hi.
Ahi zongin Topa Jesu in tua mawhnate amawhsak dingin hong pai hi lo-in, tua mawhnate sung pan suahtakna ngah un, damna ngah un ci-in damna hong piak nop manin eite kiangah hong pai ahihna thu tuni in alungdam huai mahmah I za hi.
Mikhempeuh a siangtho sa in a suak omlo hang a, ahi zongin tua siangthona I ngah theih na dingin Topa Jesu in eite adingin lam hong sial sak hi. Tuisawpna Sacramentu I sanna tawh eite in Pasian tanu tapa I suak a, asiangtho mite I suak hi. Tua bek thamlo in Christmas hanthotna I san na tawh Khasiangtho in eite sathau hong nilhin hong siansuah lai hi. Sacramentu tuamtuam te hangin zong eite in Pasian tawh pumkhat suakin siangthona sungah om hang a, tua in eite damna hong pia hi.
Topa Jesu in eite mawhnate apulak khakha ding hi lo zaw in, eite mawhnate hong siangtho sak, mawhna pan hong honkhia dingin hong pai ahihna thu tuni a thakin tel in eite in I sansa Sacrametu te asiangtho, a limci a I san semsem na dingin hanciam ding hi hang.
A cinate bek in siavuan kisam hi. Eite tuni a cina vive I hih mah bangin Topa ii hehpihna leh maisakna a kisam kinkente I hi hi. Tua ahih manin I nisim nuntakna ah Topa ii hehpihna, Topa ii maisakna leh damsakna te a kicingin I ngah zawh na dingin I lungsimte puahpha in, Topa tungah ki-ap in, siahdongpa Levi mah bangin Topa sapna aw ngai-in I zak phetin Topa nung a zui zo dente I suahzawh na dingin hanciam ciatni.

Add new comment

7 + 13 =