Homily By Rev. Fr. Raphael Khup pi (Feb 12.2022, Sat)

Mk 8: 1-10
Tuni I sim Lungdamna Laisiangtho sungah Topa Jesu in Galilee tuipi gei a om mualtung khat ah thu gen hi. Topa Jesu thu gen te mi tampitak in zaknopsa ahih manin ngaihcim thei lo ahih manin tua mun dongah mi tampitak in hong zui lai uh hi. Ni thum bang hita ahih manin mi tampitak te’ puak annek tuidawnte bei dektak ta aa, a nek a dawn ding uh om nawnlo ahih manin Topa Jesu in hehpihhuai sa hi ci-in Lungdamna Laisiangtho sungah I mu hi.
Topa Jesu in hehpihhuai sa ahih manin nungzuipite kiangah hih mite an vak un ci-in thu pia hi. Ahi zongin nungzuipi te in hih mi honpite a vak na ding an leh tui a kicing in neilo uh hi. Tua ciangin Topa Jesu in mipite tu sak in nungzuipi te kiangah no lak ah bang om ahi hiam ci-in a dot tak ciangin amaute in Khomun pum (7) om hi ci uh hi. Topa Jesu in tua Khomun te lak in thupha a piak khit ciangin amaute hawmkhia sak hi. Ngano tawm khat te zong Topa Jesu in thupha pia in amaute hawmkhia sak kik hi.
Hi munah Topa Jesu in mi honpi te a vak theih nading, na lamdang a bawl theih na dingin ama vangliatna tawh bawl thei hi na pi, nungzuipite kiangah hi mite I vak nading bang nei na uh hiam ci-in na kal masa phot hi. Nungzuipite in zong amau neih sunsun a na piak khit tak ciangin tua tungtawn in Topa Jesu in na lamdang bawl in nithum sung bang thu ngai a om mi tampitak kham dingin na nabawlsak hi. Laisiangtho in a genna ah mi (4000) bang pha hi ci hi. Hi (4000) te in anek khit ciangin a cianlai teng a kaihkhop kik ciangin seng (7) bang ngah beh lai hi ci-in I mu hi.
Topa Jesu in na lamdang a bawl theih nading, ei hong vak na dingin eite in I piak masak phot ding hong deih hi. Tua ahih manin eite in Pasian kiang pan na lamdang I lamet ciangin bangmahlo panin a piangsak thei hi na pi-in, ahi zongin eite khut tung panin I piak masak ding, I lungsim mahmah Pasian tungah I piak masak ding pen Topa’n hong deih hi cih hi Laisiangtho tungtawn in I mu thei hi.
Tua ahih manin I nuntakna sungah Pasian ii vangliatna, Pasian hehpihna thupha eite in I mu nuam hi. I ngah nuam hi. Ahi zongin Topa Jesu in eite kiang pan hong nget in bang hiam cih leh nangin na lungsim ahihkei leh nang kiang panin na neih sunsun lak panin hong pia masa in, tua pan in ken na lamdang bawl thei pan ding hing ci-in tuni hi Laisiangtho tungtawn in hong hilh hi ci-in I mu thei hi.
An duh gilkial tampitak te a vak dingin Topa in eite hong deih aa, Topa mahmah in zong eite ii I neih sunsun sung panin ong ngen masa phot hi. Tua te I piakkhak khit ciangin tua te tungtawn in Pasian in khangsak in, limci sak in anduh gilkial te adingin ong hawmkhaisak kik nuam hi. Eite mahmah in zong Topa Jesu tawh I vak masak ding zong thupi mah mah hi.
Missa biakpiakna I neih tak ciangin eite in Topa Jesu ii si leh sa, Khomun leh Lenggahzu tawh a kivak I hi aa, tua I kivak khit tak ciangin tua Khomun leh Lenggahzu sung pan aa I ngah thupha te tawh mite a vaksawn te, thupha a pia sawn te I hih zawh na dingin hanciam ding hi hang.