Homily By ; Rev. Fr. Raphael Khup pi

Lk 18 : 1 – 8
Tuni Lungdamna Lai Siangtho in, thu I nget ciangin lungkia lo-in lungduai taka nget ding hong hilh hi. Thungetna I cih pen Pasian tawh kihona, Pasian phatna, Pasian tungah lungdam kohna leh Pasian tungah I lungkhamnate pulakin I kisapna te ngetna ahi hi. Mihingte sep zawhloh, mihingte bawl zawhloh te a semzo a bawlzo khat om a, tua in Pasian ahi hi.
Tua ahih leh Topa Jesu in, “Ngen un, na ngah ding uh hi. Zong un na mu ding uh hi. Kiu un, kong khak hong kihon ding hi,” ci-in (Mt 7:7) sungah hong hilh hi. Ei lam pan nget ding pen ei tavuan, ei vaipuak hi a, ngah ding leh ngah loh ding lampang pen Pasian aa ahi hi. Ahi zongin Pasian in ngen un, na ngah ding uh hi, hong ci khin ahih manin I nget tangtang ding mah akisam ahi hi.
Thu in nget ciangin kiniamkhiatna tawh ngenni. Pasian maiah khukdin sa in ngen ni. Pharisee pa leh mawhnei mipa thungetna ah, mawh nei mipa thungetna Pasian in sang hi. Ahangin amah a kiniamkhiat man ahi hi. Thu I nget ciangin Upna leh Muanna takpi tawh ngen ni. Ankamtang cia upna na neih uh leh mual nangawn tuipi sungah na khin thei ding uh hi, Topa in ci hi. Thu I nget ciangin Lungduai, Sinsau takin ngen ni. Topa’n hong zalo hilo a, hong dawng nailo hi zaw hi. Hong muang takpi mah hiam cih a theih nopman hizaw hi.