Homily By Rev. Fr. Paul Muan Lian (Jan 7.2022, Fri)

Lk 5 : 12 – 16
Tuni Laisiangtho in Pasian um peuh lehang, ama tungah muanna takpi tawh ama kiangah zuan peuh lehang eite in bangzahta in mawhna I nei zongin Topa in I thungetna, I deihna te hong dawngin, thupha hong pia hi, hong damsak hi cihna thu hong phawk sak hi.
Tuni Lungdamna Laisiangtho sungah phaknatna anei mi khatin Topa kiangah hong pai-in, Topa aw, nang nadeih leh hong damsakin ci-in ngen hi. Jew minamte ii ngeina, thukhun sungah phaknatna aneite bang danin kigen hiam cih leh (Siam 13: 45-46) sungah I mu hi. Tua miphakpa in puankekte silhin asam phiah sak dinga, amah in amuk humin siangtholo, siangtholo ci-in a kiko ding hi. Amah in tua bang natna a vei sungteng sianglo hi ding hi. Amah giahphual pualam munkhat ah tuam om ding hi ci-in ki gelh hi. Hih in Jew minamte ii thukhun ahi hi.
Tua ahih manin phaknatna aneite in a unau asanggam, a lawm leh gual te kiang panin ki hawlkhia in khua pualam ah ama ading munkhat ki koihsak hi. Phaknatna anei mi ahi zongin phaknatna nei hi cih a ki theih ciangin a kiim apaam ah kuamah om nuamlo in ki taisan hi. Tua ahih manin phaknatna anei mipa om na munin siangtho lo hi ci-in ama paina peuhah siangtholo, siangtholo hi, na kihem un ci-in ki genkha hi. Amaute in lungleng khuangai in amaukia bek a om te uh ahi hi. Amaute in nungta napi a si mite, hell nuntakna a ciamkha te ci-in ki ciamteh hi.
Ahi zongin tuni Topa in tua bangin mi ii lipkhap, mite nawlkhin, nungta napi in misi bangin a kingaihsun mite bang ci bawl hiam? Topa aw, nangmahin na deih leh ka dam nuam hi. Ka dam ding hi ci-in Topa kiangah ong neh tak ciangin Topa in taisanlo hi. Topa in a khutzanin tua mipa sawkin na dam ding kadeih mah hi, dam ta in ci-in damna na pia hi.
Tuni eite in I lungngaih ding bang hiam? Salan Laisiangtho 33: 9 sungah, banghang hiam cih leh amah pau in leitung apiang hi. Amah in thupia a, na khempeuh kiptakin hong piangkhia hi. Tua ahih manin Topa in hi hen a cih nak leh a hi ahi hi. Dam hen a cih nak leh adam ding ahi hi. Tua Topa in eite I dam ding hong deih hi. Mawhna sungpan I suahtak ding hong deih hi. Lungleng khuangaihna pan I lungnop ding hong deih hi. Bangzahta in mawhna sungah kidiahin, bangzahta in khamtheih guihtheih tawh kidiahin, Pasian deihloh gamtat kampauna te tawh I om zongin tuni miphakpa bangin Topa kiangah zuanin Topa aw, hong damsakin ci-in Topa kiang lamah a zuam ngam mite, Topa ii damsakna, Topa ii itna a lunggulh mite I hih ding tuni Laisiangtho in hong phawksak hi.
Tua bek thamlo in Topa Jesu ii damsakna in bang hong phawksak hiam? Damna in paampaihna hilo hi. Kimawhsakna hilo hi. Damna in ki-itna ahi hi. Ki telsiamna ahi hi. Itna kilahna, ki hehpihna ahi hi cih tuni Topa Jesu ii gamtatna in eite hong phawksak hi.
Midangte mawhsakna, paampaihna tawh damna kingahlo hi, kilemna kingahlo hi, ki-itna kingahlo hi cih phawkin eite in midangte a angvante, midangte ahehpihte, a huaisiamte, a kipawlkhawm ih hihna tawh a damsak, akilemsak mite I hih ding tuni Laisiangtho in hong phawksak hi cih phawkin tha la ciatni.