Homily By Rev. Fr. Paul Muan Lian (Jan 28.2022, Fri)

Mk 4: 26-34
Tuni Laisiangtho in eite tungah khaici hong ki vawh mah bangin eite in zong mite tungah khaici I vawh kik ding hong hanthawn hi.
Topa Jesu in vantunggam pen Ankam tang tawh hong genteh hi. Ankamtang in aneu mahmah hangin hong khangin van a om vasate in a lim hong beelin bu hong tomin vasate, mite adingin noptuamna hong pia ankungpi khat hong suak hi. Vantunggam pen na neuno khat pan hong kipan hi ci-in tuni Topa’n hong gen hi. Eite in I upmawhloh, thupi I sakloh, cihtak I saklohna panin Pasian in nahoih napha, ama gam tangzai nading, ama min athan nading, mi khempeuh phattuam nading hong sem thei hi, hong lakhia hi cih tuni Topa ii gentehna in eite hong phawksak hi.
Tuni Lungdamna Laisiangtho sungah khaici vawhpa ihmut kal, ahah kal in khaici hong po in, hong khangkhia in, hong gah, hong vui hi ci hi. Ahi zongin bangci khang cih aman thei kha lo hi. Tua mah bangin eite kiangah hong kigen thu, I sim, I zak thu, upna thu, eite mai ah lam hong lak, gamtatna, kampauna tawh hong kivawh khiaci eite in bang ci khangsak ding I hi hiam? Tua khaici a khang theih na dingin eite in phalna I pia hiam? Tua lungdamna thu te I nuntakna sungah a zungkha dingin, a khangkhia dingin eite in I phal hiam? Topa in I phal ding tuni eite hong deih hi.
“Pasian in Christu minthanna thu a ki theih na dingin ko te sungah khuavak hong tangsak hi” ci-in Misiangtho Paul in Corith thuzuite kiangah na gen hi. Ahi zongin hih minthang vangliatna ko te a hi lo-in Pasian minthanna ahih lam a ki letkhiat theih na dingin kote in leibel sungah tua neih leh lam a kem ka hi uh hi ci hi. Amau ii lungtang sungah tua khuavak a om ding phal ahih manin anuntakna te sungah gimthuakna te a om zongin kisia zo lo, buaina te a tuak hangin lungkia lo, bawlsiatna te a thuak hangin Topa in hong nusia lo ci-in khuavak, khaici ama lungtang sungah om ahih manin a na thuak zo hi. Tua bangin Pasian gam atangzaisak pen amah hi lo aa, Pasian ahi hi ci-in na gen hi.
Paul in “Kei mah in ka suan aa, Apolo in tui buak hi. Akung a khangsakpa pen Pasian ahi hi. Asuanpa, tui buakpa a thupi hi lo-in, a khangsakpa Pasian a thupi ahi hi ci-in Corith thuzuite kiangah na gen hi.
Tuni in eite khempeuh tungah tua khaici hong vawh manin Pasian tanu tapa te I suak khin ta hi. Tua mah bangin eite in khaici I vawh kik ding, tua khaici a khangkhiat na dingin I nuntakna, I gamtatna, I kampauna tawh cihtak takeileh, pilna siamna nei takei lehang I hih theih zah tawh eite in tua khaici a khangkhiat nading I hanciam ding ahi hi.
Bang hang hiam cih leh eite sepna bawlna hang hilo zaw in a khangsak ding Pasian ahi hi. Eite in ama nasem bek I hi hi ci-in Misiangtho Paul in a gen mah bangin Pasian in a nakhangsak ding ahi hi. Tua ahih manin eite sungah Pasian gam hong tunga, tua khaici anuntak theih na dingin, Khasiangtho hong lut theih na dingin, tua khuavak hong lut theih na dingin a phalte I hih nading leh I nuntakna ah eite in tua khaici khangkhia sak aa, a phungsak, a kizelsak, gahhoih gahpha a gahsakte I hihna tawh Pasian min a thangsak, Pasian gam a tangzaisak, Pasian gam a phutte I hih zawh na dingin hanciam ciatni.