Homily By Rev. Fr. Paul Muan Lian (Jan 21.2022, Fri)

Mk 3: 13 – 19
Tuni Lungdamna Laisiangtho sungah Topa Jesu in nungzuipi (12) te a teelna thu I mu hi. Hih nungzuipi te tungtawnin eite zong Pasian in ama ta ding, ama nung azui ding, amah tawh om kawm ding, ama na asem dingin teelna angah I hihna tu ni eite hong phawksak hi.
Nungzuipite I et ciangin amaute in Topa Jesu kiangah ko hong zui nung ci-in athum hi lo-in, Topa in amaute a teel ahih lam tuni Lungdamna Laisiangtho in eite hong gen hi. Nungzuipite in pilna siamna neilo, kilawmna neilo, vangliatna neilo hi mah ta se leh Topa in amaute na teel hi.
Tua ahih manin Pasian tanu tapa I hihna, Pasian thu I zuihna in eite ii hanciamna, kilawmna, vangliatna hang hi lo-in Topa in eite ama adingin hong deih manin hong teelna ahih lam, hong sap ahih lam tuni Laisiangtho in hong phawksak hi. Tua hi a, “Topa Jesu in note in kei nong teel na hi kei uh aa, kei mahin note ka hong teel hi” (Jn 15: 16) ci-in Topa Jesu in a genna thu I mu hi.
Tua ahih manin eite I hihna tungtawnin Topa in hong teel hilo aa, ama ii vangliatna, ama ukna, ama lamlahna nuai ah na asem thei dingte I hih ding Topa’n hong deih ahih manin hong teel ahi hi. Tua ahih manin eite ii uplahna te hangin ahi zongin, eite launa, linglawngna te hangin ahi zongin lungkiat thanem ding hilo hi. Topa in bangzahtak in I thanem zong, hih theihna I nei kei zongin amah in eite ama ta dingin, ama nungzui dingin, ama thu um dingin, ama lungdamna thu atangko dingin, ama gam aphut ding atangzai sak dingin eite khat ciat hong sam hi, hong deih hi, hong teel hi cih phawkin tha I la ding hi.
Topa Jesu in amah tawh omkhawm ding bek hi lo-in, amah tawh a omkhopna pan a zak uh thu te, amuh uh thu te atangko khia kik dingin Topa in anungzuite adeih ahi hi. Christmas hanthotna I sanna tungtawnin eite in Christu ii galkap, teci apang dingte I hih mah bangin Christian ahi ding bek aa hong teel hi lo-in, ama vangliatna zong Topa in eite hong hawm hi. Tua ahih manin I nuntakna sungah Topa kammal te, ama gamtat zia te I etteh ding ahi hi. Tua hi leh eite in kiniamkhiatna, thumanna te I nei ding hi. Tua ciangin midangte tungah Christu Topa ahawm zo, apuakzo te I hi ding hi.
Pope John XXIII in “Pasian I theih, I it, ama na I sep bek tawh kicing lo hi. Hih leitung nuntakna sungah I veng I paam te zong I theih ding, I it ding, amaute’ na I sep sak ding, amaute kiangah Christu Topa apuakte I hih ding kisam hi. Tua hi leh eite in hong tungding tawntung nuntakah Topa sungah I veng I paam te, I lawm I gualte tawh nuam I sa khawm ding hi” ci-in na gen hi.
Tuni nang leh kei Christian thuzui I hihna in, Pasian thuzui I hihna te in lungdamna thu atangko ding, Topa Jesu tawh I omkhopna pan I ngah I sin thu te midangte kiangah a puak dingin Topa’n eite khat ciat hong deih hi cih tuni I phawk ding deih hang.
Tuni Lungdamna Laisiangtho I lungngaih kawmin I nisim nuntakna te ah eite kilawmna hang hilo, Topa’n eite hong it manin ama na sem ding, ama nungzui ding, Christian nuntakna anei dingin eite hong sam hi aa, tua ahih manin ama deihna zui-in, thu mangin, kiniamkhiat in, Pasian I itna, I theihna, Pasian na I sepna te, Pasian hoihna phatna te mite tungah apuakzo te I hihna tawh Pasian gam atangzaisak zo te I hih theih na dingin hanciam ciatni, tha la ciatni.