Homily By Rev. Fr. Paul Muan Lian (Jan 14.2022, Fri)

(Mk 2: 1-12)
Tuni Lungdamna Laisiangtho in upna tawh thu I nget ding, khat leh khat thu I ki ngetsak ding kisam pha mahmah hi cih hong hilh hi.
Tuni Topa in khut leh khe zaw mikhat dam sakna na pia hi. Bang ci bangin dam sak hiam cih leh tua khut leh khe zaw mipa ii a lawm lite hanciamna, deihsakna, panpihna hangin tuni Topa in damna na pia hi. Hih thupiang sungpan eite nuntakna dingin bang la ding I hiam cih leh thu I nget ciangin kammal tampi zat kul lo hi. Kammal a tawm theithei zangin thu I ngetna in ahoih penpen thungetna hi. Banghang hiam cih leh eite in na I sep ciangin I sep khempeuh ei tungah a kinga bangin sem ding hanga, thu I nget ciangin na khempeuh Pasian tungah kinga hi ci-in upna tawh thu I ngen ding hi ci hi.
Tuni khut leh khe zawpa in ka damnuam hi ci-in na ngen lo hi. A lawmte kiangah zong ka damnuam hi, Topa kiangah hong puakun zong na ci lo hi. Ahi zongin alawmte in Topa kiangah apuakna in damna deih hi cih thungetna limlahna hi pah hi. Hih thupiang I et tak ciangin thu I nget ciang,kammal tampi kisam lo in, Topa sungah upna, muanna kip I neih ding kisam zaw hi cih thu hong telsak hi. Tua khit ciangin Topa kiang thu I nget ciangin, amah I zuat ciangin eite in ama deih bangbang khensat sak ding hi hang. Pasian deihna bangin piang ta hen ci-in I ki-ap zawh ding kisam hi.
Topa in I ngetma nangawnin eite kisap a thei pa ahi hi. Kei-in ka sep ding teng kasem khinta hi. Ka hanciam ding teng ka hanciam khinta hi. Kei hih theihtawp ka hih khinta hi. Topa aw, na maiah kong tung hi. Na mai ah kong ki-ap hi ci-in I ki-ap zawh ding kisam hi cih tuni khut leh khe zawpa lawm lite in eite hong phawksak hi.
Tuni eite in kei ii upna in upna a thanem mite, alungleng akhuangai mite, haksatna a tuak mite adingin thakhauhna apia, lungnopna apia mah hiam? Ahih theih na dingin zong I hanciam ding kisam hi cih tuni Laisiangtho in eite hong phawksak hi.
Tua ahih manin eite in upna ah thakhauh in I om a leh eite upna in I lawm leh gualte, I kiim I paam aom mite, I nu I pa te ii hong thungetsakna, amaute ii upna hang ahi hi cih zong I phawk ding zong tuni Laisiangtho in hong phawksak hi. Tuni Lungdamna Laisiangtho tungtawnin eite in midangte ading thu I ngetsak ding, a thanem mite ading in thu I ngetsakna in thupi mahmah hi. A kisam mite adingin eite ii panpihna, deihsakna leh upna te in amaute adingin thakhauhna ahi hi cih phawkin I nisim nuntakna te sungah a ki-ap zo te, Pasian tungah muanna tawh thu angen zo te, midangte ading thu angetsak zo, apanpih zo te I hih theih na dingin hanciam ciatni.