Homily By Rev. Fr. Paul Muan Lian (Feb 11. 2022, Fri)

Mk 7 : 31 – 37
Tuni Lungdamna Laisiangtho sungah Topa Jesu in bengngong pa khat damna a na piakna thu I za hi. Hih Laisiangtho tungtawn in khat leh khat thu ki ngetsakna, ki veina, ki deihsakna, ki panpihna ii manphatna te eite in I mu hi.
Tua bek thamlo in eite mahmah in zong a bengngong, khua a za lo, Pasian kammal te, Pasian deihna te a thei thei lo, a za thei lo, a genkhia thei lo mite bangin I om na thu te zong tuni Laisiangtho in hong phawk sak hi. I nuntakna sungah haksatna, buaina tuam tuam te ahi zongin, lungleng khuangaihna te ahi zongin I bangkua sungah a om tak ciangin eite in Pasian kei kiang pan ki gamla ah taikhia hi, kua maingat ding ka hi hiam ci-in lungkia thanem in I om hi.
Ahi zongin tuni I phawk dingin Topa Jesu in vangik pua aa gim mite aw, ka kiangah ong pai un, tawldamna kong pia ding hi ci-in eite khat ciat khat ciat hong zawn hi. Ama hong sapna, hong zotna kammal te za in, ngai in ama kiangah zuan lehang, amah in tawldamna hong pia ding hi. Ama ii kammal, ama thuciam te a pel ngei lo Topa ahi hi. Tuni in ama kammal te phawkin, muangin ama kiangah I zuat ding phawk masa pen ni.
Tuni bengngong pa in a beng a ngong ban ah, pau zong pau thei lo ahih manin Topa kiangah zong thum thei lo hi. Ahi zongin ama ading thu angetsak dingin a gei aa om te in Topa Jesu kiangah paipih uh hi. Topa kiangah thum sak uh hi. Tua ahih manin Pasian hoihna phatna te pen midangte’ tungtawn panin hong kilangh khia thei hi. Ih Christian nuntakna sungah khat leh khat thu kingetsak na ii thupitna tuni hi bengngongpa in damna angahna tungtawn panin I mu hi.
Tua ahih manin eite khat leh khat ki panpih ding, ki huh ding, ki deihsak ding, ki vei ding, Topa lam ah, thuman thutakna lam ah Pasian kiangah I ki hei theih na dingin thu ki ngetsak aa, ki panpih aa, lam I kilak ding thupi hi cih tuni I Christian nuntakna ah I zat theih ding Laisiangtho in eite hong phawksak hi.
Eite in bengngong mipa mah bangin Topa’ sapna, Topa’ lawn na te phal in, Topa’ kammal te za aa, Topa ii hoihna phatna te mite tungah a tangko khia zo te I hih theih nading, mite a it, mite mawhna amaisak, thuman thutak ah teci a pang zo te I hih theih na dingin mimal khat ciat Topa’n thupha hong pia ta hen.