Homily By Rev. Fr. Paul Muan Lian (18.2.2022, Fri)

Mk 8: 34 – 9: 1
Tuni Lai Siangtho in eite khat ciat, Topa Jesu in ama nungzui dingin hong sam hi. Nuntakna taktak I ngah na dingin ama thu ngai-in, eite deihna te nialin I nisim sianglamteh te I puak ding Topa in eite hong zawn ahi hi. Topa Jesu ii nungzui I suahzawh na dingin a kisam penin bang hiam cih Topa Jesu in tuni eite hong gen hi. Ei ii deihna te nial in Topa deihna bangin zui in mang ding. Eite ii hamphatna, eite deihna khat peuhpeuh midangte adingin sup gamna dingin I ki gingkholhna in Topa nungzuih na dingin a kisam thu khat ahi hi cih zong hong thei sak hi.
Ei ii deihna nial bek hi lo-in ih singlamteh zong I puak ding ahi hi. I singlamteh bang ci puak ding I hi hiam? Eite in manpha I sak na te ahi zongin, I deihna te ahi zongin Topa adingin nial ngamna in I singlamteh puakna ahi hi. Tua haksatna, gimna te eite in thuak ding bek hi lo-in Topa nungzui ding hi lai hi. Topa nungzuihna cih tak ciangin eite ii mitsuan, eite lunggulhna, eite ii lungtang, lungsim thahatna khempeuh Topa om na lamah mai ngat in ama nungzui ding cihnopna ahi hi. Tua te in Topa nung I zuih na dingin a kisam na te ahi hi.
Ahi zongin ama nung I zuih ciangin eite in lungkham sinkhamna te ahi zongin, lungkiatna te ahi zongin, up lahna te ahi zongin tampitak ki tuak kha thei mah ding hi. Tua bang hun in Topa sungah I itna te, I lametna te, I khamuanna te a zung thuk semsem na ding hi zaw hi, nuntakna ngah nading hi zaw hi ci-in tuni Topa in eite hong zawn hi.
Topa hong nget singlamteh in ama nung zuih ding hi. Ama nungzuih ding cih tak ciangin eite in ama tungah cihtakna, upna, muanna neihna in I nisim I puak ding singlamteh ahi hi cih tuni I phawk ding deih hang. Tua singlamteh I puakna in vantunggam I tun theih na dingin Tawhtang ahi hi. I passpost ahi hi. Tua ahih manin Christian I hih nak leh singlamteh tawh ki khen thei lo hi. I singlamteh puakna ah a thupi pen in tua singlamteh puakna hangin eite in nuntakna a piangsakte I hih ding kisam hi. Eite thuak gentheih haksatna te in mite phattuamna, nuntakna pia kei leh a mawkna pi ahi hi. Tua ahih manin eite ii puak singlamteh, haksatna te in nuntakna a pia ahih ding kisam hi.
Nuntakna a piangsak singlamteh ahih na dingin eite in Topa Jesu tawh I puak khop ding thupi hi. Topa nung I zuih kul hi. Amah tawh I kigawmkhop kul hi. Amah tawh I puakkhop leh, amah tawh I sih khop leh amah tawh eite I nungta ding hi. Mite adingin zong nuntakna a pia, nuntakna a piangsak singlamteh a pua te I hi ding hi. Tua ahih manin ei Christian te in I nisim nuntakna ah singlamteh I puak pelmawh ding aa, tua singlamteh I puakna ah Topa tawh puakhawm, tua Topa tawh I puakkhopna ah itna leh nuntakna te apiangsak, a khahkhia te I hih theih na dingin Topa in eite khat ciat thupha hong pia ta hen.