Homily By Rev. Fr. Maximian Mungpi (March 1.2022, Tue)

Mk 10: 28 – 31
Tuni Lungdamna Lai Siangtho sungah nungzuipi te nuntak zia, adiak diak in nungzuipi te in Topa Jesu adingin a piak khiatna uh hangin bang teng ngah ding hiam cih thu I mu thei hi.
Nungzuipi Peter in Topa Jesu kiangah kote in na khempeuh nusia in nang kong zui uh hi, bang ngah ding ka hi uh hiam ci-in a dotna tungtawn in Topa Jesu in bang gen hiam cih leh “kei hangin ahi zongin, lungdamna thu hang ahi zongin a NulePa, a sanggam te, aneih leh lamh te anusia te in tu hun ah azah zakhat in ngah kik dinga, hong pai ding hun te ah zong nuntak tawntungna ngah ding uh hi” ci-in na dawng kik hi.
Ahi zongin hi laiah bang hangin NulePa, inn leh lo nusia cih I et kul aa, et theih ding, et phatkik ding kisam hi. Tu hunah mi pawlkhat ten NulePa, unau sanggamte pen eima lunggulhna, guih theih kham theih hang kawngin a nusia zong om thei hi. Ahi zongin tuni Topa Jesu in ama thu hangin ahi zongin, lungdamna thu hang ahi zongin NulehPa, unau sanggam, inn leh lo a nusia te in thupha ngah hi na ci hi. Na khempeuh I nusiat hangin thupha ki ngah hi pah lo-in Pasian na sepna te ah ei hong khaktan thei unau sanggam kizopna te Pasian ading in amasa pen in I koih theih nang Topa Jesu in hong deihsak na hi.
Tua ahih manin unau sanggam te, inn leh lo te nusiatna pen ei thuzuite adingin piakkhiatna khat hi aa, tuni Laisiangtho masa (Sirach) sungah zong piakkhiatna pen bang na ci gen hiam cih leh “na khat peuhpeuh na piakkhiat ciangin maitaina tawh na pia inla, lungkim takin na pia in” ci hi. Tua ahih manin ei Christian nuntak ah zong leitung ahih hangin vantunggam lunggulhna tawh I nuntakna ah I hun te, I neih leh lamh te Pasian ading piakkhiatna nisim in ki bawl kha hi. Tua ahih manin I piakkhiat ciangin maitai takin, lunggulhna tawh I piakkhiat ding, Pasian ading I hun te, I neih leh lamh te maitai takin I piakkhiat theih ding kisam hi. I neih sunsun te sung pan Pasian ading lungkim taka, hangsan taka muanna takpi tawh piakkhiatna in Pasian deihna hi.
Tua ahih manin Pasian tungah biakpiakna I neih zong pen (Sirach) Laisiangtho sung mah ah golhguk piak bangin Topa Jesu tungah piak ding hilo zaw in, Pasian tung pan mawhmaina I ngah theih nangin piakkhiatna hi zaw in tua te pen Sirach Laisiangtho at pa in thumanlo piakkhiatna te tungah ki-nga kei-in ci-in gen hi. Bang hang hiam cih leh I Topa Pasian pen a piakhia te tungah a pia kik pa hi a, eite tungah a zah tampi hong pai kik ding hi ci hi.
Tua ahih manin Topa Jesu nungzui ei Christian te in I nuntakna sungah piakkhiatna pen neih leh lamh te bek hilo in, hun leh I siamna te zong mite ading ahi zongin, Pasian gam tangzai nading ahi zongin, mite phattuam nading a zangkhia thei tanu tapa te I suahzawh nading I hanciam ding kisam hi.
Bang hang hiam cih leh thuman piakkhiatna in Pasian deihna piakkhiatna hi. Tua ahih manin I piakkhiat te tungtawn in hong pia kik ding pen I Pa Pasian hi a, Pasian in thu khen ding pa ahih mah bangin angvan tuam neilo in lungsim takpi tawh apiakhia te, lungsim takpi tawh biakpiakna anei te Pasian in azah sawm thum, sawm guk, za khat dongin hong pia kik dinga, mailam ah zong tawntung nuntakna hong pai ding hi ci-in tuni Lai Siangtho tungtawn in I mu thei hi.
Tua ahih manin hi bangin Pasian deih piakkhiatna, Topa Jesu nungzuihna te ah neih leh lamh tampi hilo zaw in, I neih sunsun maitaina tak tawh, I upna ah lungkim takpi in Pasian deihna ah anungta zo tanu tapa te I suahzawh nangin nisim in a kisam thupha te I biak Pa Pasian tungah thungen in I kalsuan ding tuni a ki hanthawn I hi hi.