Homily By Rev. Fr. Maximian Mungpi (Feb 22.2022, Tue)

Mk 16: 13-19
Tuni Lungdamna Lai Siangtho sungah Topa Jesu in Caesarea Philippi a ki ci na mun a tuntak ciangin nungzuipite kiangah mite in kei kua hi hong ci uh hiam ci-in a dot ciangin nungzuipi te in mite muhna dan te gen in pawlkhat te in tuisawppa John, pawlkhat te in Elijah, pawlkhat in Jeremiah a hih kei leh kamsang khat peuhpeuh hi ding hi ci uh hi ci-in dawng uh hi. Tua khit ciangin Topa Jesu in nungzuipi te kiangah note in kei kua hi hong ci na hi uh hiam ci-in a dot ciangin Nungzuipi Peter in ‘Nang pen Pasian Tapa, Christu na hi hi’ ci-in a dawng tak ciangin Topa Jesu in Peter kiangah hi thu si leh sa in nang hong theisak hi loin, vantunga om ka Pa in nang hong theisak ahih manin nang thuphangah mi na hi hi. Nang in Peter na hi hi. Hih suangpi tungah ka Pawlpi ka lam ding aa, hell khua’ kongkhak te in tua pawlpi susia zo ngei lo ding hi ci-in Topa Jesu in Peter tungah na gen hi.
Hih mihing tapa cih pen Laisiangtho lui kamsangpa Daniel (7: 13,14) ama mangmuhna sungah ‘mihing tapa tawh a kibang mi khat meii tungah a tuang kamu aa, amah in vangliatna, minthanna leh kumpiza ngah ahih manin gam tuamtuam te, minam tuamtuam te, kam pau nam tuamtuam a pau te khempeuh in ama na sem ding uh hi. Ama ukna gam kip tawntung dinga, bei thei lo ding, kisusia ngei lo ding hi’ ci-in mihing tapa in bang hiam cih Laisiangtho lui tungtawn in ki mu thei hi. Tua ahih manin mihing tapa in Pasian tapa, Mesiah kumpipa a cihna hi.
Peter in nangin Pasian tapa Christu na hi hi a cih ciangin Topa Jesu in Peter kiangah hi thu si leh sa in nang hong theisak hi loin, vantunga om ka Pa in nang hong theisak hi a cih mah bangin Topa Jesu in ama nungzuite lak pan amakai ding, a lian pen ding pen ama deihna bangin teel tuan loin a Pa Pasian deihna bangin Peter pen thuneihna ahi vantunggam tawhtang amah na pia hi.
Tawhtang cih pen thuneihna lim hi aa, tua thuneihna in Peter in ama lawm (11) te amakai ding ahi zongin, upna lam ah ahi zongin, gamtatna lam ah ahi zongin ama ii thuneihna lim angahna hi. Tua hi aa, Peter in ama nuntak sungin a sia pa Topa Jesu ii thugenna te phawkin alawm leh gual te Makai in Pasian thu leh la te a tangko na te I mu thei hi.
Topa Jesu in tua pawlpi dawi gilo te in zo ngeilo ding hi a cih na in, Topa Jesu in hi pawlpi ii lutang ahih manin pawlpi pen ama sihna, nithum khit ciangin a thawhkikna tawh pawlpi pen hell khua, dawi te in hen zo lo hi, zo zolo hi cih I mu thei hi.
Tua ahih manin tuni Laisiangtho tungtawn in Peter in Topa Jesu thupiakna tawh kizui in leitunga ahen khempeuh vantung ah kihen dinga, leitunga aphel khempeuh vantung ah zong kiphel ding hi cih thuneihna Topa Jesu in a piakna tungtawn in eite ii a lianbel Siampipa in zong ama thuneihna tawh, zawhthawh thu tawh hi loin thuzui mite, ama naseppih te phattuam na ding, pawlpi ading, upna lamah aman ahi thei zahzah in ama ii thuneihna te I mu thei hi.
Tua ahih manin tuni I thungetna ah Siampi lianpa, Siadaw te, Siampi te in thuzui mite thuman thutang tawh upna lamah hoih takin hong makaih zawh nang, thuzui ten zong amau makaihna te lungkim tak leh lungnuam takin a zui zo tanu tapa te I suah zawh nang I hanciam ding pen Topa in hong deih hi cih tuni phawkin Pasian deihna bangin nisim anungta zo te I suahzawh nangin hanciam ciatni.