Homily By : Rev. Fr. Maximian Mungpi ( 7. 12. 2021 (Tue)

Mt 18 : 12 – 14
Tuni Lungdamna Lai Siangtho sungah Topa Jesu in tuu mangthang gentehna hong nei hi. No te in bang ci ngaihsut na hi uh hiam cih dotna tawh Topa Jesu in hong pan hi. Eite’ nuntakna sungah zong ih deih phadiak van om thei hi. Tua bangin ih deih phadiak van khat peuhpeuh ih mansuah ciangin zon kik ding a hun pia zo lo ih hih manin adang khat ki lei kik thei ziau hi.
Tuni Lai Siangtho sungah tuu zakhat neipa in a tuu khat mangsuahin a om ciangin adang tuu (99) te nusia in amang tuu a zong dingin kuankhia hi ci-in Topa Jesu in gentehna hong gen hi. Bang hangin 99 te nusia in amang tuu khat zong dingin kuankhia ahi hiam? Topa Jesu in a gennopna ah ei mihing te pen Pasian lim leh mel sunin ong bawl ahih manin eite khat peuh ih mang ding Pasian in deih lo hi cih ih thei hi. Leitung neih leh lamh te tawh ki bang lo-in eite pen Pasian mai ah amanpha mahmah ama bawl sa te ih hih lam ih phawk ding kisam hi.
Khat veivei ciang eite zong amangthang tuu tawh ki bang ding hi hang. Christian thuzui hi napi, ih gantatna te ah Topa Jesu deihna bangin ih gamtat zawhloh ciang, ih gamtatna te tawh Topa Jesu nung ih zuih zawhloh ciang, eite in ih thuak ding ahi, ih Singlamteh ahi, gentheihna, gimna, haksatna te thuak zo lo-in Pasian tungah ih mawhsak hun tampi om thei hi. Tua bang hun ciangin eite in a mangthang tuu no tawh ki bang hi hang. Tua ahih manin Topa Jesu in a mangthang tuu no te a zong dingin hong kuan den hi. Eite lam pan Topa Jesu in hong muh theih nangin a kigingsa in ih om ding ki sam hi. Topa Jesu in ong zotkikna teh eite in dawngin ama nung ih zuihzawh kik theih nang hanciam ciatni.