Homily By Rev. Fr. Maximian Mung pi (Jan 18.2022, Tue)

Mk 2: 23-28
Tuni Lungdamna Laisiangtho sungah Topa Jesu in Sabbath ni te tungah ukna anei Topa ahihna thu I mu hi.
Sabbath ni-in Pasian tawh kizopna ni, suahtakna ni hi mah ta leh tua ni-in eite’ pumpi taksa ading a kisap leh zong akisam bangin Sabbath ni te ah zong hih khuan, bawl khuan om hi ci-in Topa Jesu in ong thei sak hi.
Topa Jesu in ong gennopna in Sabbath ni pen mihingte phattuam nading in a kibawl hi aa, mihingte in Sabbath ni adingin a nungta hi lo hi cihna thu hong thei sak hi. Tua manin Sabbath ni cih pen Nipi kaal khat sungah nikhat khawlin Pasian tawh I kizopna te I khangsak semsem ding, I upna, I lametna te, I itna te I khangsak semsem ding a thupi pen ahih zawkna thu hong thei sak hi.
Tua ahih manin eite in Nipi ni te ah kikhopna, Missa kahna te tawh Pasian tawh I kizopna I khangsak ding, I kipsak semsem ding pen thupi zaw hi. Khat veivei ciangin eite in Pasian tawh I kizopna ding sangin leitung na te I sep na te pen hoihlo hi. Topa Jesu in Sabbath ni te in thupha bawl ding a thupitna, na sem lo-in I om khong sangin nasem in ei phattuam nading, mi phattuam na ding, Pasian tawh I kizopna te phattuam nading bawlna ni hi zaw hi.
Tua ahih manin Sabbath ni pen mihingte phattuam na ding aa kibawl hi cih Topa Jesu hong gen thu te phawkin, Topa Jesu mahmah zong Sabbath ni anei Topa ahihna thu phawkin Sabbath ni in eite in thungetna tawh Pasian a phawk thei te tanu tapa te I suahzawh nang leh tua bek thamlo, nipi kaal khat ah niguk sung na I sepna te ah zong Pasian tawh a kizom zo, Pasian maiah anungta zo tanu tapa te I suahzawh nangin khat leh khat thu kingetsak in Sabbath ni ah Pasian tawh I kizopna a khangsak semsem zo dingin, anungta Pasian it tanu tapa te I suahzawh nang khat leh khat thu ki ngetsak ciatni.