Homily By : Rev. Fr. Joseph Zo Mung (Nov 18, 2021)

Lk 19 : 41 – 44
Tuni Lungdamna Lai Siangtho sungah Topa Jesu a kahna ih mu hi. Topa Jesu kap cih ciangin ama ii Pasian taktak a hihna leh mihing taktak a hihna thu tel takin ih thei hi. Leitung mite zong bangzah ta in kilian sakin, bangzah ta-in kiphasak ta leh khat veivei ciangin akah hun, a khasiat hun om veve hi.
Topa Jesu ii kahna in hehpihna aneihna hang leh itna aneihna hang hi a, ama adingin a kap hilo in mite adingin akap ahi hi. Leitung mite kahna in ama gimna, gelna te atangtun loh ciangin a kap tamzaw hi.
Tuni eite in Topa Jesu in leitungah kilemna puak dingin hong pai hi, lungnopna pia dingin hong pai hi cih phawkin eite in Topa Jesu hong puak kilemna, lungnopna ih ngah nang leh midangte tungah itna ih neih theih nangin han ciamni.