Homily By : Rev. Fr. Joseph Zo Mung (Nov 18, 2021)

Lk 19 : 11 – 28
Tuni Lungdamna Lai Siangtho sungah Topa Jesu in ih ngahsa thupha, talent te ih metbawl ding hong deih ahih manin thugentehna khat hong gen hi.
Tua a thugentehna ah bang gen hiam cih leh mi thupi khat in kumpi za angah khit ciangin a ciah kik dingin khual gamlapi ah a zinkhai dingin a kithawi hi. Amah in a nasemte sawm samin, minao sawm pia a, ‘Kong ciah kik mateng hih sumte tawh summet na bawl un,’ ci-in vaikha hi.
Amah a ciah kik ciangin a nasemte in bangzah ciat a met ngah hiam cih dong hi. Ama sa nih te in hoih tak met bawl ahih manin sum met angah ciat uh mah kiangah pia uh hi. Ahi zongin a thumna pa in ‘Topa aw, hih lai-ah na sum om hi; puan tawh tunin mun khatah ka koihcip hi. Bang hang hiam cih leh nang mi genhak na hi a, na koih lohpi la-in, na vawh lohpi at na hih manin nang kong kihta hi,’ a ci hi. Tua ciangin a topa in tua hi leh bang hangin summet khakte’ kiangah ka sum ap lo na hi hiam? Tua bangin hih lecin kong ciah kik ciangin ka sum a met tawh ka ngah kik thei ding hi,’ ci hi. Tua khit ciangin ‘tua pa’ tung pan sum mina khat lakhia unla, mina sawm a neipa pia un,’ ci hi.
Hi Lai Siangtho in bang hong thei sak nuam hiam cih leh ih nuntakna sungah Topa hong piak thupha te ama adingin amet tampi in ih zat theih ding hong deih hi cih hong thei sak nuam hi.