Homily by Rev. Fr. Joseph Zo Mung. (June 16. 2022)

Tuni Lungdamna Laisiangtho (Mt 6: 7 - 15) tung tawnin Rev. Fr. Joseph Zo Mung tung pan Kha-an vakna. Christu sungah kong it nulehpa, ulehnau te, tuni I sim Lungdamna Lai Siangtho sungah thungetna tawh kisai, I zuih ding leh I zuih loh ding thu nam nih hong hilh hi. I zuih loh ding thu sungah bang hong gen hiam cih leh “No te in thu na nget uh ciangin Gentile mite bangin kammal tampipi zangin thu na ngen kei un” ci hi. Thunget ciangin kam tampipi kisam lo hi, na ngetma uh in na kisapna uh Pasian in hong thei khin hi ci-in Topa Jesu in hong hilh hi. Tua ahih manin tuni I thungetna te ah ei deihna te bek pulak in a ngen te I hi hiam cih kisittel ni. Bang ci bangin thungen cih hong hilh na ah “Vantunga om kote’ Pa aw, na min siangtho ta hen. Na gam hong tung ta hen. Vantung ah na deihna a kicin mah bangin, leitung ah zong kicing ta hen. Nisim-a kisam annek tuidawn tuni-in hong pia in. Kote’ tunga hong mawhte ka maisak mah bangun, kote’ mawhnate zong hong maisak in. Ze-etna lakah hong kihelsak loin, hoih lohna khempeuh pan hong honkhia in,” ci-in na ngen ding uh hi ci-in hong hilh hi. Bang hangin hi bangin hong hilh hiam cih leh thu I nget ciangin Pasian deihna phawk ding, Pasian min phatna zong nei ding cihna hi. Pasian deihna leitungah a kicing nangin a ngen ding I hi hi. Tua in Topa Jesu ii deihna hi. Ahi zongin eite in Pasian deihna a kicing ding sangin ei deihna a kicing nangin thu I ngen kha zel hi. Pasian deihna in bang hiam cih I phawk masak ding kisam hi. Pawlpi in hong bawlsak thungetna te pen Pasian kammal tungtawn, Lai Siangtho tungtawn in hong bawlsak ahih manin kammal tampi ki tuap lo-in, Pasian deihna hong thei sak ahih manin Topa in hong hilhna tungtawn in pawlpi in hong bawlsak ahi hi. Tua ahih manin pawlpi hong bawlsak thungetna te I nget ciangin leitung, vantung, misiangtho te tawh kipawl in thu angen I hih manin vangnei hi. Hih pawlpi hong hilh thungetna te I nget ciangin Lai Siangtho a simsim I hih manin dawite ki hawlkhia zo hi. Dawi te’n kihta hi. Tua ahih manin thu I nget ciangin ngaihsun ni. I lungsim panapiang tawm te I nget ciangin deih pulak tawh kibangin, I deih peuhpeuh I pulak kha aa, Pasian deihna tawh kituak lo zong tampi om thei kha hi. I lungsim sunga piang tawm thungetna te ngenlo ding cih a hih tuan loh hangin, Topa Jesu hong hilh thungetna te in vang nei zaw hi cih phawkin pawlpi thungetna te zang siam ni. Pawlpi hong ciapteh sak thungetna te I nget ciangin manpha hi. Pawl khat ten lamdangsa in RC Pawlpi ten thu anget uh ciangin a deihna uh pulak lo-in Ave Maria aw ci ci hi ci uh hi. Ahi zongin hih thungetna kammal te I lawh limlim ciangin Lai Siangtho a sim I hi aa, Pasian deihna a zui I hih manin tua te in vang nei-in, manpha hi cih phawk ni. Tua ahih manin thu I nget ciangin Pasian deihna a ki cing nading a ngen I hihna thu te leh eite deih bek a pulak te hilo aa Pasian min a phat, Pawlpi hong bawlsak thungetna te tawh thu a ngen thei te I hih zawh nangin zong han ciamni. Tua banga I hih zawh nangin I biak Topa Pasian in ei mimal khat kim ciat thupha hong pia ta hen.