Homily By Rev. Fr. Joseph Zo Mung (Jan 8. 2022, Sat)

Jn 3 : 22 – 30
Tuni Lungdamna Laisiangtho sungah Tuiphumpa John ii a kiniamkhiatna, thuman thutak a tangkona, teci apang ngamna thu teltakin I mu hi.
Tuiphumpa John in Topa Jesu hong pai nading thu tangko in, tua hun sungin amahin midangte tuisawpna, tuiphumna pia ahi manin mi tampitak in ama nung azuih laitakin Topa Jesu in zong tuisawpna pia ahih manin John ii nungzuite in haza in John kiangah vagen a, nang ahilo midang khat in hualai munah tuisawpna pia hi, mite in ama nung zui uh hi ci-in hazatna lungsim tawh a vagen ciangun John in bang ci hiam cih leh Pasian in akhuan pia kei leh hih theilo ding hi. Tunglam pan apai, Pasian thupiakte bek hih thei hi. Hih pen thuman thutak ahih manin thuman thutak kilangpang lo hi. Kei ii teci ka pangpa pen amah ahi hi. Hong pai ding hi ci a ka gen pa amah hi. Tua ahih manin note zong kei ii ka teci na hi uh hi, kei ka neu semsem ding a, amah a lian semsem ding hi ci-in hangsan takin gen hi.
Cihnopna in mitampi takin Topa Jesu nungzui in pai a, tui phumpa John taisanta ahih manin ama nungzuite in amau siapa mah alianpen hi sak nuam ahih manin a siapa kiangah a gen ahi uh hi. Ahi zongin John in lungsim hoih nei ahih manin kiniamkhiat in kei pen amah tawh ka kigenteh thei kei hi. Ama thu a tangko ding bekin kei hong pai ka hi hi ci-in ama ii hihna man kiniamkhiat takin gen hi.
Leitungah min leh za adeihte, minthan nading bek a na asemte in Pasian min a than sangin amau min a than ding utzaw uh hi. Ahi zongin anungta Pasian a bia, a zui, a it mi peuhmah in ama min a thansak ding sangin Pasian min thangsak zaw hi cih tuni Laisiangtho in hong thei sak hi.
Tua ahih manin leitungah Makai hoih Makai siam I cihte in kua te hiam? Amah bekbek in Makai sem ding cih hilo a, thuman thutak tawh a makaih ding mite ii amakaihna pen mite kiangah a zuih ding aa a hilh siamte ahi hi. Angsung thei te in kua te hiam? Thuman thutak a deihlo te kua hiam? Amah bekbek lian den ding, mi khempeuh in ama nungzui ding, amah bek aana nei hi den ding, tua lungsim tawh na asem te in lamkhial den a, kineihkhem in ama hihna sangin kiphasak zaw in amah leh amah kilamsang nuamzaw hi.
Ahi zongin thuman thutak a deih, itna tawh anungta, a citak mi in bang ci hiam? Ama ii ahihna man hoih takin pulak khia in, midangte hoihna mukhia a, midangte phatsiam, midangte hoihna te mu in pahtawi thei a, thuman thutak aom na thu mite a hilh thei te in mi picing ahi hi. Tuni John in mi picing te I hih nading hong hilh hi.
Tuni hih Laisiangtho I lungngaih kawmin kei koi munah om ka hi hiam? Thuman thutak a deih dinmunah om ka hiam? Kei min pha semsem ding, kei bekbek ci-in Pasian mi a kiam sak semsem munah om ka hiam cih ki ngaihsun in, thuman thutak in gualzo den hi cih zong phawkni. Tua hi leh thuman thutak nuntakpih in thuman thutak tawh om thei ding hihang.
Tua ahih manin tuiphumpa John bangin kiniamkhiat in amah lian semsem ding hi, kei ka neu semsem ding hi ci-in midang khempeuhin ei hong phatlo zaw in, Pasian phat in Topa Jesu a phat theih na dingin panpih ciatni.