Homily By Rev. Fr. Joseph Zo Mung (Jan 30.2022, Sun)

Lk 4: 21-30 Tuni Laisiangtho te in Upna leh Itna kician nei lehang lungnopna I ngahna thu hong phawksak hi.

Lungdamna Laisiangtho sungah Topa Jesu in ama piangna khua ah lungdamna thu a tangko ciangin tua kim aom mite in siamsa in lamdangsa in, pakta mah ta leh amau khua pan apiang ahih manin um zo lo-in, hi pa in Maria leh Joseph te tapa hi lo ahi hiam? Hih pilna te koi pan angah ahi hiam ci-in lamdang sa-in dotna abawlna thu leh Topa Jesu in kamsangpa Elijah hun lai aa thupiang leh kamsangpa Elisiah hunlai aa thupiang te na hilh hi. Hi bangin a hilhna in kialpi tun hunin meigong tampi om hi mahtaleh tua te in Pasian um lo ahih manin amaute kiangah Pasian na kilang lo-in Zarephath khua-a meigongnu kiang logal adangte kiangah Elijah kisawl lo-in, miphak zong tampi om hi mahtaleh Syria mi Naaman bakin damna na ngah hi. A um te tung bek ah Pasian in na lamdang lak hi cih Topa Jesu in a gen nopna hi.

Tua bangin a gen ciangin amaute heh ahih manun, tua a thugenna inn sung pan Topa Jesu paikhiatpih in mualsang dawn pan khiatsuk sawm uh hi. Tua bangin akhuapih te in Topa Jesu na nial hi. Hih thu en lehang upna a tawm ciangin dotna tam hi. Innkuan sungah zong ki muanlohna a tam ciangin buaina piang hi. Itna I neihloh hangin Pasian tung nangawn ah ki lungduai lo hi. Pasian in ze-etna deih lo hi. Khat leh khat I ki ze-et sangin um suk ziau ding, it ding deih hi. Hi bangin I haksat kawmkal ah Pasian in ka thunget za maw, za lo maw ci-in I lungkham hun zong om kha ding hi. Tua bangin I om ciangin lungnopna kingah lo ding hi.

Tua ahih manin leitung ah innkuan sung, nasepna mun, Pawlpi sung, khua sung, gam sungah khat leh khat ki muanglohna atamna pen ki-itna a tawmna leh upna a tawmna hang hi. Tua ahih manin upna leh itna a tawm ciangin Pasian nangawn ki um zo lo-in, Pasian in sem a hong sawlte nangawn kisem ngamlo in, thunget ding nangawn ki thadah thei hi. Ahi zongin tuni ken mite tungah itna nei maw, nei lo cih I ki sittel ding ka deih hi. Pasian in kei it maw, hong it lo cih tawh I lungkham sangin ken Pasian it maw, it lo cih I kisittel in thupi zaw hi.

Midangte tungah itna neih tantan in nang zong itna anei hi pah a, tua itna na nei na hih manin nang sungah itna om pah aa, nang sungah upna om ahih manin tua ii agah in lungnopna hi. Tua ahih manin tuni Laisiangtho te in bang hong thei sak hiam cih leh itna leh upna kician nei lehang I nuntakna te sungah lungnopna ki ngah hi cih phawk ciatni. Tua ahih manin itna leh upna kician I neihzawh nang hanciam ciatni.