Homily By Rev. Fr. Joseph Zo Mung (Jan 19.2022, Wed)

Mk 3: 1-6
Tuni Lungdamna Laisiangtho sungah Topa Jesu in Sabbath ni khatin khutzaw mi khat damsak a, tua pen Pharisee te in amawh sakna thu I mu hi.
Bang hangin Pharisee te in Topa Jesu mawhsak hiam cih leh itna tawh na asep man ahi hi. Thukham palsat hi ci-in amawhsak uh ahi hi. Topa Jesu in amuhna leuleu pen hi mipa hehpih huai, khut cih pen Pasian in abawl lai-in mite huh nading, nasep nadingin a bawl ahih manin hi mipa in akhutzaw in bangmah sem zo lo ahih manin Pasian deihna bangin damna ngahlo ahih manin hehpihhuai sa in itna tawh na sem hi.
Pharisee te, Jew minamte thukham zuihna in Sabbath ni-in bangmah hih lo ding cih tawh zui hi. Ahi zongin Topa Jesu in Sabbath ni-in itna tawh na sem ding, Pasian lungkimna, Pasian deihna zui ding cih tel ahih manin amah in ngeina sangin Pasian deihna thupi sak zaw ahih manin thukham palsat in Pasian deihna azui ahi hi. Tua ahih manin I ngeina te in Pasian tawh hong kinai sak maw, hong ki nai sak lo cih I phawk ding, I ngeina te, thukhamte banghang a kibawl cih I phawk ding kisam hi.
Thukham khempeuh a kibawlna in Pasian deihna tawh kituak lo-in, asia aa I gamtat ding alau manin, asia aa I gamtat ding Pasian in deihlo ahih manin thukham a hong pia ahi hi. Tua ahih manin Pasian deihna I zuih nak leh thukham azui I hi pah hi. Pharisee te in thukham a kammal bang lianin zui-in, adeihna zui lo uh hi.
Topa Jesu in thuman thutak tawh na sem ahih manin, thuman thutak adeihlo ten mawhsak in aman nuam, athah nuam ahi hi. Tulaitak I kawlgam mahmah en ni. Thuman thutak adeih te, hehpihna aneite a kimawhsak lai tak hi. Pharisee te in amau a ki huh ding ut in, mi khempeuh sila in zang ahih manin amauten mite itna neilo, hehpihna nei lo-in, damsak nading zong don lo uh hi. Tua bang mahin thuman thutak hang tawh thong akia, gal atai mi tampitak om hi. Tua te adingin I khut I khe te, I kam te, I lungtang te koi bangin zang ding I hi hiam? Tua te pen mite huh na dingin Pasian in hong piak ahi hi. Tuni eite in thuman thutak adingin ken bang sem thei ka hi hiam cih ngaihsun ni.
Eite hih theih bangbang tawh I pangkhop ciangin tua thuman thutak hong kilang dinga, Pasian deihna hong tangtung ding hi. Topa Jesu in kei thuman thutak ka hi hi a cih mah bangin amanlo khempeuh langpangin amah guakbek ahi zongin khauhtakin om in thuman thutak gen ngamin, nungzuipi (12) hong teelin, tua tawh Pawlpi hong phuankhia in tu in leitungbup ah thuman thutak hong kizel ta hi.
Tua mah bangin thuman thutak adeih khempeuh in hangsan takin amaute’ nuntakna pia ngamin, thuman thutak a ki zelh na dingin na sem ngam hi. Tua in thuman thutak asemte pen thuman adeihlo, dawimangpa tawh a kipawl miten langpang hi cih zong tuni Laisiangtho in hong thei sak hi.
Hih Laisiangtho tungtawnin I ngeina te, I thukhamte Pasian deihna bangin zui ding cih phawkni. Tua khit ciangin thuman thutak in gualzo ding hi. Kei thuman thutak adeih a, thuman thutakin gualzawhna a ngah na dingin na asem ka hi hiam? Ahih kei leh thuman thutak adeihlo, thuman thutak asemte aman nuam, a thahnuamte a pawlpih ka hi hiam cih ki ngaihsun in eite in Laisiangtho tungtawnin hih thu nam nih lungngai in I nuntakna te sungah Pasian deihna tawh kituakin I ngeina thukhamte zui-in thuman thutak I nuntakpih zawh nangin hanciam ni.