Homily By Rev. Fr. Joseph Zo Mung (Jan 10.2022, Mon)

(Mk 1: 14-20)
Tuni Lungdamna Laisiangtho sungah tuiphumpa John a kimat khit ciangin Topa Jesu in lungdamna thu tangko a kipatna thu I mu hi. Amah in bang ci tangko hiam cih leh Pasian gam hong tung dektak ta hi. Kisikkik unla lungdamna thu um un ci-in tangko hi. Tua khit ciangin Galilee tuipi ah Ngabeng ahi, Simon leh a sanggampa Andrew kiangah ka nung hong zui un ci-in sam hi. Tua khit ciangin Zebedee tapa James leh John kiangah zong ka nung hong zui un ci-in sam hi. Tua panin amaute in a ngente uh nusia in, a Pa uh nusia in Topa Jesu nung a zuihna uh thu I mu hi.
HIh Laisiangtho in bang hong thei sak nuam hiam cih leh Pasian gam, lungdamna hong theisak nuam hi. Lungdamna I cih in bang hiam? Pasian ukna a cihna ahi hi. Pasian ukna cih pen munkhat bek, gam khat bek hilo a, mun khempeuh hi. Ama ii tokhom in vantung leh leitung hi a, ama ii ukna in tangzai mahmah hi ci-in Salan sungah hong gen hi. Kamsangpa (Daniel 4 : 3) sungah zong Pasian ii ukna, vangliatna, ama gam pen eite ii I upmawhna sangin nakpi takin lianzaw in vanglian zaw a, eite I lungsim, I mitkha in zong a telin I mu zo kei hi ci-in na gen hi.
Catholic Pawlpi I cihin leitung mun tuamtuam ah upna khat sungah nungta in, nungzuipi te pan hong kizom, Topa Jesu hong hilh thute, Catholic siangtho Pawlpi ka um hi I cih mah bangin Topa Jesu hun pankipan Christian a kici khempeuh in upna pulakna I neih mah bangin tuni tuhun dongin ama phuatsa pawlpi kipin tua sunga omte in lungnopna ngah, thuman thutak thei, Laisiangtho thei.
Tua ahih manin Topa Jesu in tuisawpna angah khit teh ama Mission te hong kipat mah bangin eite khat ciatin zong tuisawpna I ngah khit ciangin Pasian tanu tapa hi khin I hih manin Topa Jesu hong hilh lungdamna thu te zong I nuntakna sungah zangin mite tungah I hilh sawnsawn ding a kisapna thu zong tuni Laisiangtho in hong thei sak hi.
Topa Jesu in nungzuipite a sap mah bangin eite khat ciat zong hongs am ahih manin ama ukna gam sungah om lehang thuman thutak in gualzawhna hong nei ding, thuman thutak tawh ki uk ding, Pasian deihna in koi bang hiam cih tel dinga, I tel khit ciangin I nuntakna te sungah hong nuam ding hi. Tua ahih manin eite khat ciatin Topa Jesu hong sapna, na mawhna kisikkik inla lungdamna thu um in ci-in hih lungdamna thu um a I zuih zawh nang hanciam ciatni.