Homily By Rev. Fr. Joseph Zo Mung (Feb 17.2022, Thur)

Mk 8: 27-33
Tuni Lungdamna Laisiangtho sungah Topa Jesu in a nungzuite kiangah mite in kei kua hi hong ci uh hiam ci-in a dotna thu I mu hi. Nungzuipi te in pawlkhat te in Elijah hi ding hi ci uh aa, pawl khat te in kamsang khat teitei hi ding hi ci uh hi ci-in dawng uh hi. Tua ciangin nungzuite kiangah note in kei kua hi hong ci na hi uh hiam a cih ciangin Peter in nangin Jesu Christu na hi hi ci-in dawng hi.
Tanglai in mipi te in Topa Jesu thupi sa mahmah ahih manun, tua hun lai a mi minthang kamsangte dingin na ngaihsun aa, pawl khat te in galhang, gal zo pa in zong na ngaihsun hi ci-in Laisiangtho lui sungah na thei hi. Ahi zongin Peter in mipite muhna sangin a sang zaw in mu in Topa Jesu in gumpa, honpa, mite mawhna pan a tankhia pa hi ci-in thei ahih manin Topa Jesu lungkim mahmah hi. Ama pianzia, mawhna panin mite tatkhiatna, muhdahna pan it na ah kaihna, ama nasepna taktak pen Peter in tel ahihna thu Topa Jesu in thei hi.
Tua ahihmanin Topa Jesu pen ei Zomi te in bang ci muh I hi hiam? Ki sittel ni. Nidanglai in Topa Jesu pen eite adingin Lawki pan Christian ah hong paipihpa hi. Beh leh phung, khua khat leh khua khat, ki do na panin kipumkhatna ah hong paipihpa, ki muhdahna pan ki-itna ah hong paipihpa Topa Jesu hi. I Zogam, khamtunggam pan kawlgam, gam tuamtuam ah hong tung sakin thupha hong pia pa Topa Jesu ahi hi. Topa Jesu in eite thupha hong pia in hong tonpih hi.
Ahi zongin tuni eite I kisittel dingin, nidanglai bangin ki muhdahna, ki khenna, mi namkhat leh nam khat ki do na te om nawnlo, gal leh sa om nawnlo in Christian sungah ki pumkhat in I om ta hi. Tua I nuntakna pan a sangzaw ah I kah na ding ah ze-et na tampi I thuak kha ding hi. U leh nau sung, beh leh phung sungah Topa Jesu min mah tawh a ki khensak, pawlpi hang tawh mite tawh a kilem lo mi tampi zong ki om hi. Tua pen dawi mangpa ze-et hi aa, I ki dop mahmah ding thupi hi.
Topa Jesu in ki pumkhatna hi cih thei na pi in, Topa Jesu min mah suangin pawl ki khenkhen, u lehnau ki khen cih bangin ki totna tuamtuam te zong om thei kha hi. Tuni tua te kipuahpha in Topa Jesu in kei adingin bang hiam? Lungnopna hong pia pa hi. Cidamna hong pia pa hi. Ki pumkhatna hong pia pa hi. U leh nau sung kilemna hong pia pa hi, leitungah deidanna om lo-in itna tawh na a sem pa, mawhna pan hong tankhia pa, asia pan ahoih ah hong paipih pa hi cih phawkin eite in I nuntakna sungah tua lungnopna I ngah nangin I hanciam ding kisam hi.
Tua hih manin tuni Topa Jesu in kei adingin bang hiam? Nang adingin bang hiam? Topa Jesu hong piak ki pumkhatna, ki-it kilemna tawh kalsuan in lungnopna I ngah nang, ama sungah anuamsa mi I hih nang, mawhna sungpan a suakta, tatkhiatna angah, a lungnuam, a lungdam mi I hih zawh nangin hanciam ni. Tua banga I hih zawh nangin Topa Jesu in hong deih hi. Minuamsa I hih ding hong deih hi cih phawkin Topa Jesu hong deihsakna bangin I zuihzawh nangin han ciamni.