Homily By Rev. Fr. Joseph Zo Mung (Feb 15.2022, Tue)

Mk 8: 14-21
Tuni Lungdamna Lai Siangtho sungah nungzuipite in gunkuang tungah a kah toh uh ciangin Khomun khat bek pua ahih man un lungkham in a kikupna thu I mu hi. Tua khit ciangin Topa Jesu in amaute kiangah Pharisee te silngo leh Herod kumpipa ii silngo tawh na ki sawh loh nang un na kidawm un ci-in thu apiakna leh na lungsim uh khauhsak lai na hi uh hiam cih dotna, note in bil nei na pi-in za lo-in, mit nei na pi-in na mu kei uh hi ci-in a totna thu I mu hi.
Pharisee te’ silngo cih ciangin amaute in Topa Jesu ii na lamdang bawl te mu in, a thugen te zong a bil tawh za hi mahtaleh a lungtang sungah lut zo lo, um zo lo ahih manin muh theihna kha mit taw a hih manin mu na pi um zo lo a hih manun na lamdang ngen uh hi. Amaute in Moses thukhamte tawh siangtho na ngah ding sa-in a lungsim uh ki puahpha lo ahih manun Topa Jesu in amaute bangin na hih loh nang un na kidawm un ci-in a nungzuipi te kiangah a gen ahi hi.
Herod kumpipa ii silngo in bang hiam cih leh a mah in thuman leh thumanlo thei, tui phumpa John in thuman mi hi cih thei na pi, ama kamciam khat pelh nuamlo ahih manin amanlo mah in gamta in John ngawng tan hi. Tua in Herod kumpipa ii silngo hi. Asia apha khentel thei napi a pha zui nuam lo-in a sia mah zui teitei hi.
Tua ahih manin tuni Topa Jesu in nungzuipite nakpi tak in thu hilh hi. Eite zong hi silngo bangin I nungta hiam? Herod kumpipa silngo tawh I ki bang hiam?
Anungzuipi te mahmah in gunkuang tungah a tuang uh ciangin Pongmoh nei lo uh ahih manin lungkham in ki kum mawk hi. Topa Jesu in na lamdang a bawlna thu te amaute in thei in mu hi na pi, lungkham teitei uh ahih manin Topa Jesu heh in amaute tai hi.
Eite zong I nuntakna sungah Pasian in na lamdang tampi hong lak khin hi. Ih pu I pa te khanga thupiang, ei khanga thu piang te tungtawnin Pasian vangliatna tampi I tel thei khin hi. Asia apha khentel theihna zong I nei hi. Ahi zongin I gamtatna I zuih taktak ciangin I lungsim tawng puahpha lo-in a pua tham leitung nuntakna te bek tawh I nuntak ciangin Pharisee te silngo leh Herod kumpipa silngo tawh a ki sawhkha I hi hi. Tua ahih manin tuni tua te pan ki dawmin Topa Jesu tungah upna I neih ding pen Topa’n hong deih hi. Upna aneu ciangin I lungkham hi.
Nungzuipi te in Topa Jesu tawh gunkuang tungah tuang khawm ahih manin a lungnuam ding uh ahi hi. Ahi zongin amaute in uplahna nei ahih manun a lung uh naumlo hi. Eite zong leitung ah I nuntakna te ah Pasian in na khempeuh hih thei hi cih thei mah ta lehang I si sung I sa sungah nungta sak zo lo I hih manin, uplahna nei I hih manin I lungkham veve hi.
Tua ahih manin (1 Jn 4: 18) na sungah “Itna sungah launa om lo hi, a kicing itna in launa a vengsak hi” ci hi. Eite in Pasian tungah a kicing it na nei lehang lau na bei ding aa, a sia a pha I khentel theih khit ciangin thuman thutak tawh gamta ngam ding I hi hi.
Tuni Topa Jesu in note in bang tanvei ngak lai ding na hi uh hiam? Mit nei na pi-in mu lo, Bil nei na pi-in khua za lo te tawh ki bang hi uh teh a cihna te phawkin eite in mit nei, bil nei I hih manin asia apha khen tel thei I hih manin Topa Jesu tungah upna muanna nei-in thuman thutak ah I gamtat zawh nang hanciam ni.