Homily By Rev. Fr. Joseph Zo Mung (Feb 13.2022, Sun)

Lk 6: 17,20-26
Tuni I sim Lai Siangtho te in tu laitak Kawlgam sungah I tuak gentheih haksatna te tawh ki tuak pha mahmah hi. Tu laitak in natna satna tuamtuam te leh gal leh sa buaina tuamtuam te hangin thuman deihna tawh a kipiakhia te in khat veivei ciangin thuman aa gamtatna hangin sum I kisak hun zong om thei kha hi.
Ahi zongin tuni Lai Siangtho Pasian kammal in eite kicing takin hehnepna hong pia hi. Lai Siangtho masa sungah kamsangpa Jeremiah in “Mihing tha bek muangin mihing hatna bek suanga, a lungsim Topa tawh a ki lehngat mi in samsiatna angah ding hi” ci-in gen hi.
Tu laitakin zong mihau, mi lian, aana nei mi tampitak te ii nasepna en lehang Pasian a muanna sangin amaute ii hauhna, amaute’ liatna, amaute’ minthanna, aana neihna te a ut bangin a zang vive hi-in tua a zatna uh tungtawn in amaute in gualzo a kisak mahmah uh hun tung aa, tua aana zatna sung pan in thuman thutak amu, a thei te in a gen gamloh uh hun zong hong tung hi.
Lai Siangtho nihna ah Misiangtho Paul in Corinth thuzuite tungah “Eite’ upna pen a man takpi hi, thawhkikna om hi. Thawhkikna a omlo hi leh Topa Jesu zong hong thokik lo ding hi” ci-in hilhcian na nei hi.
Lungdamna Lai Siangtho sungah Topa Jesu in “Mizawng note in thupha ngah na hi uh hi. A gilkial note in thupha ngah na hi uh hi. Bawlsiatna thuak te in thupha ngah ahi hi” ci hi. Tu laitak haksatna thuak eite in tua I thuak gentheih haksatna te thupha ngah in I ki tuat hiam, I ki tuat kei hiam cih I ki ngaihsut ding thupi hi.
Misiangtho I cih te in bang hangin lungnuam zo hiam? Hoihna phatna, lungsim puak zia te amaute in leitungah khel zo ahih manin amaute’ omna mun ah khat leh khat ki tot kiselna, huaihamna, leitung buaina munte ah amau om mah ta leh amau om na munte mun siangtho suaksak in khel zo hi. Pasian thu tawh zo sak veve hi.
Tua ahih manin eite in zong I om na mun ciatciat ah thuman thutak gualzo sak ding, Pasian thu in gualzawhna hong pia ding hi cih phawkin I lungtang sungah koih in, kiplet lehang tua in eite I om om, I pai pai na ah lungnopna, lungdamna hong pia ding hi. Lungsim kiniamkhiat mite in thupha ngah ding hi, bawlsiat simmawhna thuak te in thupha ngah ding hi cih, tua thupha ei tungah hong tung dinga, tua lungnopna I ngah khit ciangin leitung bek hilo, I sih khit ciangin I Kha in nopsakna ngah ding hi.
Tua ahih manin tu pankipan I lungsim puakzia khel zo lehang, I omom na mun ah ei tawh a kithuah mite khempeuh zong kikhel ding aa siatna tawh a kidim a kici leitung mun pen mun siangtho hong suak ding aa, misiangtho te om na mun hong suak ding hi.