Homily By Rev. Fr. Joseph Zo Mung (Dec 24, 2021)

Lk 1 : 67-79
Tu kaal sunga I sim Laisiangtho te sungah Tonu Maria in Elizabeth a notsetna ahi zongin, Elizabeth kiangah ahawhna ahi zongin, Khasiangtho tawh a kidimna, Khasiangtho asan na, Zechariah in vantungmi hopihna aw a zak ciangin Khasiangtho tawh a kidimna cih thu te I thei hi.
Tuni Laisiangtho sungah Zechariah Khasiangtho tawh kidim in Israel mite’ Topa Pasian in thupha ngah ta hen. Bang hang hiam cih leh amah in amite angvan in a tankhia zo hi ci-in, ama innkuan sungpan in hotkhiatna ki khat hong po to zo hi ci-in amah in amuhna thu na tangko hi. Khasiangtho tawh a kidimte bang ci om hiam?
Tonu Maria in Khasiangtho tawh a kidim ciangin Pasian phatin ka Topa aw kei tungah nong bawl thupha vanglian hi, ka Kha in Topa phat hi ci-in Pasian phatin na lungdam hi. Elizabeth in zong ka Topa’ nu kei kiangah hong hawh ding, bang hang in hi bang hamphatna ngah ka hiam ci-in Pasian na phat hi. John zong Khasiangtho asan ciangin lungdamin a nu gilsung pan nadiang hi. Zechariah in zong Khasiangtho angah teh lungdam in Pasian na phat hi. Khasiangtho asangte omzia bang ci bang hiam cih tuni Laisiangtho in hong thei sak hi.
Eite’n zong Khasiangtho I san ciangin Pasian phat nopna lungsim nei ding, I lungsim sungah lawpna, lungnopna tha tawh hong kidim ding a, Pasian phat lo-in ki om thei nawnlo dinga, lungdamna tawh Pasian I phat ding hi.
Tua ahih manin tuni eite khat ciat kisit tel in lungdamna tawh Pasian phat lo-in ka om thei hiam? Zingsang I thawh ciangin Pasian phat nopna lungsim I neih leh ei sungah Khasiangtho a om hi cih I phawk ding kisam hi. Thunget ding, Pasian phat ding I tha adah leh Khasiangtho angah neilo cih I phawk ding kisam hi.
Khasiangtho angahte, Khasiangtho a sangte in lungnopna tawh kidim in Pasian phat hi ci hi. Tua ahih manin eite zong lungnopna tawh kidim in Pasian a phat zo te I hih zawh na dingin han ciamni.