Homily By Rev. Fr. Joseph Zo Mung (Dec 21, 2021)

LK 1 : 39-45
Tuni Tonu Maria tungtawnin Pa Pasian in a it mahmah a ngaihno dingin Tonu Maria hong teel khia aa, tua pen bang ci teel cih eite in thei lo hi hang. Pasian in ama deih peuhpeuh a teel hi. Tua ahih manin Pasian nasem ding te zong Pasian in ama deih bangbang teel in tua bangin a teel khit ciangin Tonu Maria tungtawn in leitung mite ading alian penpen lungdamna thupha Christmas pawi (lungdam pawi) ih cih Topa Jesu hong pia in Pasian in Tonu Maria tungtawn aa leitung mite a hong piak letsong alian penpen in Topa Jesu ahi hi. Tua pen ih Sacramentu masa pen hi.
Tua Topa Jesu hangin leitung in nopna, lungdamna, gupkhiatna angah ih hi hi. Tua ahih manin Topa Jesu asang eite khempeuh in bang phawk ding I hi hiam? Pasian in Tonu Maria na teel masa hi. Tonu Maria in Khasiangtho tawh na kidim masa hi. Khasiangtho tawh a kidim manin ama sung pan Khasiangtho gah ahi Topa Jesu hong piangkhia a, ama aw aza Elizabeth in zong lungdamin Tonu Maria phat in, Pasian a phat theih mah bangin ama sung aom John in zong lungdam in na diang hi.
Tua ahih manin eite in zong tuni Tonu Maria hangin Khasiangtho I ngahnate phawkin Topa Jesu I sang zawh na dingin han ciam ni.