Homily By Rev. Fr. Joseph Zo Mung (Dec 17, 2021)

Mt 1 : 1-17
Tuni Lungdamna Laisiangtho sungah Topa Jesu koi pan hong pai cih ih thei hi. Tuni Topa Jesu hong ki rdwfquf na ah Pasian tapa mihing hong suakin khang bangzah dong cih bangin ama khang kisim thei-in hong suahna thu ih thei aa, tuni hih khang simna ih et ciangin bang phawk ding I hiam cih leh Pasian in mite thupha hong piak ciangin amawkmawk in hong pia lo-in akhangkhang in a banban in thupha hong pia hi cih I phawk ding kong deih hi.
Tua bek tham lo-in, kiteenna Sacramentu a sangte kiangah Siampi te in thupha a piak ciangin amaute ki-itna a kho na ding leh a suan akhak te tungah khang thumna, khang lina dongin natu nata te mu in ci-in thupha pia-in akhangkhang in thupha kipia hi. Pasian kiangpan I ngah thupha namkimte ih et ciangin akhangkhang in abanban in kingah a, thupha ngah minam I cih tua ahi hi.
Tuni I phawk dingin Topa Jesu koi pan hong pai hiam? A khangkhang in hong pai a, Pasian tapa ahih na, eite zong I pu I pa te pan ngaihsun toto leng, Topa Jesu bang hun pan sang I hi hiam? I pu pankipan maw, I pa pankipan maw? Tuni in eite in Topa Jesu ih san theihna pen I pu pan zong hi thei, I pa pan zong hi thei in tua bangin a banban in thupha kingah hi cih phawkin eite in hong nusia sa I pi I pu te phawkin amau tungtawn a thupha I ngahna te phawkin thu I ngetsak ding hi. Eite zong thupha I kipiak ciangin a tu ata, asuan akhak dongin khang thumna khang lina dongah thupha ngah mi suah zawh na dingin thupha I kipia dinga, thu I ki ngetsak ding kisam hi cih tuni Laisiangtho in hong thei sak hi.
Tuni in eite khat ciatin kei koi pan pai kahiam cih kingaihsun in I pi I pu te, a sisate kha ading thu ngetsak in khang tampi ading thungetsak in ei ading zong thungen in khangtampi in thuphangah minam suahzawh na dingin khat leh khat thu I kingetsak ding zong kisam hi cih tuni Laisiangtho in hong thei sak hi. Pasian thupha a sangte ih suahzawh na dingin ei mahmah pankipan in midangte zong pattah in, I sanggam ulenau te tungah Pasian thupha a tun nangin ei mahmah in a pattah zo te ih suahzawh nang hanciam ni.